Къуныжъ Мухьамэд фэгъэхьыгъ

Къэрэщэе-Щэрджэсым и Парламент идепутатэу щытыгъэ Къуныжъ Мухьамэд фэгъэхьыгъэ шIэжь зэнэкъокъу самбэмкIэ Щэрджэскъалэ щыкIуагъ.

— Дунаим самбэмкIэ изэнэ­къокъу дышъэр къыщыдэзыхыгъэ Къуныжъ Мухьамэд респуб­ликэм ицIыф цIэрыIоу щытыгъ. Общественнэ-политикэ щыIакIэм чанэу хэлажьэщтыгъ, Адыгеим иныбджэгъушIугъ, — къытиIуагъ Адыгэ Республикэм самбэмкIэ испорт еджапIэ ипащэу, спортымкIэ дунэе класс зиIэ мастерэу Делэкъо Адамэ.

Урысыем ия V-рэ шIэжь зэ­нэкъокъу ныбжьыкIэхэр щызэ­IукIагъэх. Алырэгъум бэнэкIуи 140-рэ фэдиз щызэнэкъокъугъ.

Къалмыкъым, Чэчэным, Къэ­бэртэе-Бэлъкъарым, Къэрэщэе-­Щэрджэсым, Ставрополь ыкIи Краснодар крайхэм, Адыгэ Рес­публикэм защызыгъасэхэрэр зэнэкъокъугъэх. Адыгеим ихэ­шыпыкIыгъэ командэ медали 5 къыдихыгъ.

ЛIыхъурэе Мурат, кг 49-рэ, апэрэ чIыпIэр къыдихыгъ. Къуа­джэм Iоф щызышIэрэ тренерэу Гъомлэшк Алый М. ЛIыхъураем ипащ.

Тыгъужъ Тимур, кг 46-рэ, Хьа­къуй Эльдар, кг 49-рэ, Хьадпэшъо Дамир, кг 53-рэ, ятIонэрэ чIыпIэхэр къахьыгъэх. Тренерхэу А. Хьабэхъум, А. Гъомлэшкым, И. Нэгъоим бэнакIохэр агъасэх.

Мырзэ Арамбый, кг 79-рэ, ящэнэрэ чIыпIэр къыдихыгъ, тренерыр Хъ. ГуIэтыжь. Нэгъэ­рэкъо Бислъан, кг 71-рэ, я 5-рэ хъугъэ, тренерыр С. Мэрэтыкъу.

2005 — 2007-рэ илъэсхэм къэхъугъэ кIалэхэм зэнэкъокъум яIэпэIэсэныгъэ щауплъэкIугъ. Адыгеим, хэгъэгум самбэмкIэ ащыкIощт зэIукIэгъухэм ахэлэжьэнхэу загъэхьазыры.

Сурэтым итхэр: хагъэунэфыкIыгъэ чIыпIэхэр къыдэзыхыгъэхэр.