ЯзэфыщытыкIэ щыIэныгъэм щэпытэ

Адыгэ Республикэм самбэмкIэ изэнэкъокъу Мыекъуапэ щызэхащагъ. 2005 – 2007-рэ илъэсхэм къэхъугъэ кIалэхэр зэIукIэгъухэм ахэлэжьагъэх.

Къырым ыкIи Севастополь Урысыем къызэрэхэхьажьыгъэ­хэм фэгъэхьыгъэ зэнэкъокъум бэнэкIуи 100 фэдиз щызэIукIагъ.

НыбжьыкIэхэр купи 9-у гощыгъагъэх. ТекIоныгъэр къыдэзыхыгъэхэр: Тыгъужъ Тимур, кг 46-рэ, ЛIыхъурэе Мурат, кг 49-рэ, Хьадпэшъо Дамир, кг 53-рэ, СтIашъу Эльдар, кг 58-рэ, Гъу­кIэлI Хьазрэт, кг 64-рэ, Нэгъэ­рэкъо Бислъан, кг 71-рэ, Мырзэ Арамбый, кг 79-рэ, Мамыхъо Астемир, кг 88-рэ, ХьакIэмыз Ахьмэд, кг 88-м къехъу.

Тренерхэу А. Хьабэхъум, А. Гъомлэшкым, И. Нэгъоим, А. Чэтыжъым, М. Еутыхым, С. Мэрэтыкъом, Хъ. ГуIэтыжьым, З. Ацумыжъым, М. ШъэоцIыкIум текIоныгъэр къыдэзыхыгъэхэр агъасэх.

Кушъу Тамерлан, Георгий Гвинепадзе, Хьакъуй Эльдар, Бэгъушъэ Азир, Илья Ивановым, Анцокъо Амир, Хьатхъохъу Рус­там, Кушъу Долэт, БжьашIо Расул, ГъукIэлI Иляс, Александр Колодкиным, Былымыхьэ Амир, Михаил Извековым, ДзэлI Рэмэзан, нэмыкIхэм я 2 — 3-рэ чIыпIэхэр къахьыгъэх.

— Къырым, Севастополь зэфыщытыкIэу адытиIэр щыIэны­гъэм щэпытэ, — къытиIуагъ Адыгэ Республикэм самбэмкIэ испорт еджапIэ ипащэу, Урысыем спортымкIэ дунэе класс зиIэ мастерэу Делэкъо Адамэ. — Спортсменхэр зэлъэкIох, ныбджэгъуныгъэ зэдыряI. Адыгеим щыщ спортсменхэм дзэ къулыкъур Къырым, Севастополь ащахьы.

Мыекъуапэ щыкIогъэ зэнэкъо­къум хагъэунэфыкIырэ чIыпIэхэр къыщыдэзыхыгъэхэр Къыблэм самбэмкIэ изэIукIэгъухэу гъэтхапэм и 24 – 27-м Новороссийскэ щызэхащэщтхэм ахэлэжьэщтых.

Сурэтым итхэр: зэнэкъокъум хэлэжьагъэхэр.