Тащытхъунэу хъугъэп

«АГУ-Адыиф» Мыекъуапэ – «Луч» Москва – 20:21 (11:7).
Гъэтхапэм и 9-м республикэ спорт Унэшхоу Кобл Якъубэ ыцIэ зыхьырэм щызэдешIагъэх.

«Адыиф»: къэлэпчъэIутхэр: С. Кожубекова, Баскакова, ешIакIохэр: Клименко – 1, Краснокутская – 3, Никулина – 2, Серадская, Богданова – 6, Измайлова – 3, Куцевалова – 1, Стрельцова, Кириллова – 1, Казиханова – 1, Кобл – 1, Ю. Кожубекова – 1.

ТекIоныгъэр «Адыифым» къыдихыщтэу тыгугъэзэ, зэнэкъо­къум теплъыгъ, ау тыхэукъуагъ. ЯтIонэрэ едзыгъом «Луч» нахь псынкIэу ешIагъ. Я 42-рэ такъи­къым пчъагъэр 18:17 хъугъэ. Ащ ыуж — 18:20, Г. Измайловар ухъу­макIохэм аIэкIэкIи, хъагъэм Iэгуаор ридзагъ – 19:20.

«Адыифым» тигъэгугъэзэ, «Лучым» тикъэлапчъэ Iэгуаор къыдедзэ – 19:21-рэ. ЗэIукIэгъур аухынкIэ такъикъитIу къэнагъ. Г. Измайловар икIэрыкIэу тиешIакIохэм къахэщыгъ. УхъумакIохэр къызэринэкIыхи, хъагъэм Iэгуаор ридзагъ – 20:21-рэ. ХьакIэхэм ягандбол командэ Iэгуаор ыIыгъ, мыгуIэу ешIэнэу регъажьэ, уахътэр къызыфегъэфедэ…

С. Кожубековам, Д. Богдановам, Е. Краснокутскаям, Г. Из­май­ловам, нэмыкIхэм такъы­щытхъу тшIоигъуагъ, ау «Адыифым» иешIакIэ щыкIагъэу фэтлъэ­гъугъэр бэ. Нэбгырэ пэпчъ лъэ­кIэу иIэр командэм фигъэIорышIэным фэшI «Адыифым» иешIакIэ къыгъотын фае. ОшIэ-дэмышIэу ыпэкIэ илъызэ Е. Краснокутскаям хъагъэм Iэгуаор ридзэщтыгъ. З. Коблыр ухъума­кIохэм ябэнызэ, кIуапIэ къыгъотыгъ, хъагъэм Iэгуаор ри­дзагъ. Д. Казихановам тикъэлапчъэ дэжь щыригъажьи, ешIакIохэр къызэринэкIыгъэх, хъагъэм Iэгуа­ор ридзагъ.

ТиешIакIохэм загъорэ IэпэIэсэныгъэу къахафэрэр зэнэкъо­къум нахьыбэрэ щагъэфедэ зы­хъукIэ, ятекIоныгъэкIэ тагъэгушIощт.

ЕшIэгъухэр

«Кубань» — «Ростов-Дон» — 23:24 (12:15), «Динамо» — «Уфа» — 33:17 (19:9).