Рэхьатныгъэ зыми иIэп

Хэгъэгум футболымкIэ иапшъэрэ куп хэт клубхэм я 21-рэ ешIэгъухэр мэзаем и 6 – 8-м яIагъэх.

…Дунэе спортым щызэлъа­шIэрэ журналистэу Юрий Розановым ыгу къытеожьырэп. Илъэс 60-м итэу тхэкIыжьыгъ. Тележурналистэу Ю. Розановым нахьыбэрэмкIэ футбол ешIэгъухэр зэрэкIохэрэр къыIуатэщтыгъэх. ИгущыIэкIэ спортым пыщагъэхэм алъыIэсыщтыгъ.

2020 – 2021-рэ илъэс зэнэкъо­къум хэхьэрэ я 21-рэ ешIэгъухэр Урысыем истадионхэм ащырагъэ­жьэнхэм ыпэкIэ Юрий Розановым зы такъикъэ фэшъыгъуагъэх. ЩымыIэжьым Тхьэм джэнэт къы­рет.

ЕшIэгъухэр

ЦСКА – «Ахмат» — 2:0, «Ротор» — «Химки» — 0:0, «Ростов» — «Шъачэ» — 0:0, «Урал» — «Уфа» — 0:0, «Динамо» — «Тамбов» — 2:0, «Спартак» — «Краснодар» — 6:1, «Арсенал» — «Локомотив» — 0:3, «Рубин» — «Зенит» — 2:1.

Анахь гъэшIэгъонхэр

Футбол ешIэгъум текIоныгъэр къыщыдэзыхыщтыр къэшIэгъуае. «Рубин» «Зенит» зыIокIэм, Деспотович пенальтикIэ я 41-рэ такъикъым «Зенит» икъэлапчъэ Iэгуаор дидзагъ — 1:0. Азмун ухъумакIохэм ябэнызэ, шъхьэкIэ «Рубин» икъэлапчъэ Iэгуаор дахэу дидзагъ — 1:1. ЗэIукIэ­гъур аухынкIэ такъикъ 15 къэнагъ. «Зенит» нахьыбэрэ ыпэкIэ елъы шъхьае, хъагъэм Iэгуаор дидзэн ылъэкIырэп.

Макаровыр ешIапIэм игупчэ итэу ыпэкIэ псынкIэу лъыкIуатэу фежьагъ. «Зенит» иухъумэкIуитIури ыгъэплъэхъуи, къэлапчъэм Iэгуаор дидзагъ — 2:1, уахътэр 90+2. «Зенит» зигъэрэхьатырэп. «Рубин» иухъумакIо шапхъэр еукъо, пенальти, уахътэр 90+9. Дзюбэ къэлапчъэм лъэшэу дэ­уагъ, ау лъхъанчэу быбырэ Iэгуаор къэлэпчъэIутэу Дюпиным къыубытыгъ. «Рубин» текIоны­гъэр къыдихыгъ.

ЦСКА-р «Ахмат» дешIэзэ, Рондон пенальтикIэ я 38-рэ такъикъым хъагъэм Iэгуаор дидзагъ — 1:0. Я 52-рэ такъикъым Рондон шъхьэкIэ ытыгъэ Iэгуаор Влашич метрэ 14 фэдизкIэ зыпэчыжьэ къэлапчъэм дидзагъ — 2:0.

«Динамэр» «Тамбов» зыдешIэм, Грулевым я 38-рэ такъи­къым, Моро я 90-рэ такъикъым (пенальтикIэ), къэлапчъэм Iэгуа­ор дадзагъ.

«Локомотив» иешIакIоу Смоловым я 71-рэ такъикъым «Арсенал» икъэлапчъэ Iэгуаор ди­дзагъ. Я 75-рэ ыкIи 85-рэ такъикъхэм «Локомотив» пчъагъэм хигъэхъуагъ.

«Спартак» 6:1-у «Краснодар» зэрэтекIуагъэм узэгупшысэн хэлъ. «Краснодар» иухъумакIохэр, къэлэпчъэIутыр уагъэрэзэнэу зэремышIагъэхэр къыдэтлъытэзэ, хъагъэм Iэгуаор дэзыдзагъэхэ Соболевым, Промес, Ларссон, Понсе ацIэхэр къетэIох.

Зэгъэпшэнхэр

ЕшIэгъуи 3-мэ пчъагъэр ащызэфэд — 0:0. Команди 9-мэ я 21-рэ ешIэгъухэм къэлапчъэм Iэгуаор ащыдадзагъэп. «Арсенал» къэлапчъэм Iэгуаор зыдимыдзагъэр ешIэгъу пчъагъэ хъугъэ, ауж къинэхэрэм ащыщ хъугъэ. «Ротор» лъэкIуатэ, апшъэрэ купым къы­хэнэжьын имурад. «Краснодар» итренерхэр мэгумэкIых, яIэнатIэ IуагъэкIынхэмкIэ щынагъо щыI.

«Рубин» командэ лъэшхэу «Спартак», «Зенит» атекIуагъэми, медалыр ыхьыщтэу зыми къыIо­рэп. Апэ итхэм рэхьатныгъэ яIэп.

Хэт тыдэ щыIа?

1. «Зенит» — 42
2. ЦСКА — 40
3. «Спартак» — 38
4. «Шъачэ» — 37
5. «Динамо» — 36
6. «Локомотив» — 34
7. «Ростов» — 34
8. «Рубин» — 34
9. «Краснодар» — 31
10. «Химки» — 29
11. «Ахмат» — 26
12. «Урал» — 23
13. «Ротор» — 18
14. «Уфа» — 14
15. «Арсенал» — 14
16. «Тамбов» — 13.

Я 22-рэ зэIукIэ­гъухэр

12.03
«Химки» — «Ростов»
13.03
«Урал» — «Ротор»
«Арсенал» — ЦСКА
«Зенит» — «Ахмат»
«Динамо» — «Спартак»
14.03
«Уфа» — «Рубин»
«Тамбов» — «Краснодар»
«Локомотив» — «Шъачэ».