Вакцинацием мэхьанэшхо зэриIэр къагурыIон фае

Санитар-эпидемиологие шапхъэхэр къызэрэдалъытэрэм, зэпахырэ узхэм къытырамыгъэзэжьыным япхыгъэ Iофыгъохэм Адыгэ Республикэм и ЛIышъхьэу КъумпIыл Мурат ренэу ынаIэ атырегъэты.

Зэпахырэ узхэмкIэ Iофхэм язытет республикэм тIэкIу на­­-­х­ьышIу зэрэщыхъугъэм емылъы­тыгъэу коронавирусыр къызэутэ­лIагъэхэм Урысые Федерацием псауныгъэр къэухъумэгъэнымкIэ и Министерствэ ыгъэнэфэгъэ шапхъэхэм атетэу ящыкIэгъэ IэпыIэгъур икъоу арагъэгъоты. ЦIыфхэм вакцинэхэр зыхарагъэлъ­хьаным лъэшэу анаIэ тыра­гъэты.

«Коронавирусым зиу­шъомбгъунымкIэ щынагъо джыри зэрэщыI, вирусым иштаммыкIэхэр хэ­гъэгум къырахьанхэ алъэкIыщт. Специалистхэм зэралъытэрэмкIэ, Iоф­хэм язытет нахь дэй мыхъуным ыкIи зэпахырэ узхэм къытырамыгъэзэжьыным апае вакцинэхэр зыхарагъэлъхьан фае. Республикэм исхэм ар къагурыIон ыкIи врачхэм игъо зэралъэгъурэм тетэу прививкэ зарагъэшIын фае», — къыIуагъ КъумпIыл Мурат.

ЦIыфхэр прививкэ зыщашIырэ чIыпIэ 30 республикэм щызэхащагъ. ПстэумкIи Спутник V зыфиIорэм фэдэ вакцинэ 14402-рэ Адыгеим къыIэкIэхьагъ. Непэрэ мафэм ехъулIэу Адыгеим ис нэбгырэ 9258-мэ прививкэ зарагъэшIыгъ.

Адыгэ Республикэм и ЛIышъхьэ ипресс-къулыкъу