ЦIыфыбэмэ къызфагъэфедэ

Хьыкум приставхэм я Федеральнэ къулыкъу исервисэу «Ход исполни­тельного производства» зыфиIорэр къэралыгъо фэIо-фашIэхэм япортал­кIэ анахь псынкIэу зекIоу алъытагъ: закъыфэзыгъазэхэрэм япроцент 90-м ехъумэ яIофыгъохэр нэгъэупIэпIэгъу 30-м къыкIоцI зэхафых.Чэщ-зымафэм нэбгырэ мин 30-м ехъумэ мыщ зыратхэ.
Хьыкум приставхэм къызэIуахыгъэ Iоф зэфэшъхьафхэм афэгъэхьыгъэ къэбархэр мыщ ижъугъотэщтых. ГущыIэм пае, чIыфэ зытелъым пшъэдэкIыжьэу рагъэ­хьыщтыр, къэралыгъом игъунапкъэхэр зэпичынхэ зэрэфимытыр, нэмыкIхэри.
ХэбзэухъумакIохэм адэжь умыкIоу сервисэу «Ходатайство приставу» зыфиIорэм амалэу къытыхэрэри къызфэбгъэфедэнхэ плъэкIыщт. Мыщ Iоф зишIэрэ 2020-рэ илъэсым шэкIогъум и 26-м щегъэжьагъэу непэрэ мафэм нэс нэбгырэ мин 250-м ехъумэ зыкъыфагъэзагъ.
2019-рэ илъэсым егъэпшагъэмэ, хьыкум приставхэм яофициальнэ интернет-сайтэу «Банк данных исполнительных производств» зыфиIорэм къихьэхэрэм япчъагъэ процент 97,5-кIэ нахьыбэ хъугъэ ыкIи миллион 580-м шIокIыгъ.
Хьыкум приставхэм я Федеральнэ къулыкъу АдыгеимкIэ и ГъэIорышIапIэ ипресс-къулыкъу