Гъогу Iумылхэм шъуащысакъ!

Ом изытет зыкъызэблихъуи, гъогухэр къытыригъэщтыкIыгъэх, ащ
осыр къытесэжьыгъ. Адыгэ Республикэм и Къэралыгъо автоинспекцие
гъо­гу­рыкIоным хэлажьэхэрэм закъыфегъазэ сакъыныгъэ къызха­гъэфэ­нэу.

Нахь пасэу шIункI къызэрэ­хъурэм дакIоу, республикэм игъогухэр Iумыл хъугъэх. Во­дительхэм агу къагъэкIыжьы — блэгъащэу уапэ ит машинэм уекIуалIэ хъущтэп, узэрэ­чъэрэм илъэшыгъэ нахь къыщыбгъэкIэн фае. Мыщ фэдэ уахътэм зекIокIэ къулайныгъэр къэбгъэлъэгъонэу, ошIэ-дэмы­шIэу автомобилыр къэбгъэуцунэу щытэп.
Зыщышъумыгъэгъупш гъогур Iумыл зыхъукIэ, хъугъэ-шIагъэ ухэфэным ищынагъо къызэрэуцурэр.
Общественнэ транспортыр къызыщыуцурэ чIыпIэхэм, машинабэ зыщыкIорэ гъогу зэхэ­кIыпIэхэм ыкIи нэфры­гъуазэхэм апашъхьэ анахьэу сакъыныгъэ къызщыхэжъугъаф!
Водительхэм ямызакъоу, лъэс­рыкIохэми мы лъэхъаным анахьэу ягулъытэ агъэIорышIэн фае. Машинэхэр зэрыкIохэрэ гъогур зэпышъучы зыхъукIэ, бгъу пстэумкIи зышъуплъыхь. Шъуищыгъынхэм къэнэфырэ пкъы­гъохэр ахэшъулъхьанхэу зыщы­шъумыгъэгъупш!
Iэшъынэ Сусан.
Сурэтхэр Iэшъынэ Аслъан тырихыгъэх.