АмалышIухэр къэзытыщт проект

Адыгеим и ЛIышъхьэу КъумпIыл Мурат пшъэрылъэу къыфишIыгъэм диштэу АР-м и Премьер-министрэу Геннадий Митрофановыр пшъэдэкIыжьэу ыхьырэмкIэ гъунэпкъэ гъэнэфагъэ зиIэ обществэу «Эрнст энд Янг» зыфиIорэм илIыкIохэм аIукIагъ. Республикэм промышленнэ чIыпIэ щыгъэпсыгъэным иIофыгъо лъэныкъохэр тегущыIагъэх.Адыгеим социальнэ-экономикэ хэхъоныгъэ ышIыным иунэе программэ къыдыхэлъытагъэу мы IофшIэныр агъэца-
кIэ, тишъолъыркIэ промышленностым хэщэгъэ инвесторхэм япчъагъэ нахьыбэ шIыгъэным ар фэIорышIэ. Проектыр зыщагъэцэкIэщт ыкIи псэуалъэхэр зытырашIыхьащт чIыгу гектари 194-рэ Тэхъутэмыкъое районым щагъэнэфагъ. Инвестициехэм алъэныкъокIэ муниципалитетыр хъопсагъоу зэрэщытыр мыщ къыдалъытагъ, районым псэупIэхэр, социальнэ псэуалъэхэр бэу щашIых, ащ нэмыкIэу инфраструктурэ зэтегъэпсыхьа-
гъэ иI, аэропортыр, мэшIоку гъогур къыпэблагъэх, федеральнэ гъогухэр пхырэкIых. Ащ ишIуагъэкIэ индустриальнэ паркым гъогухэр, электричествэр, псыр ыкIи гъэстыныпхъэ шхъуантIэр псынкIэу ращэлIэнхэ амал щыI.
Шъолъырым хэхъоныгъэ ышIынымкIэ, ащ дакIоу промышленностым зыщиушъомбгъунымкIэ мы проектым игъэцэкIэн мэхьанэшхо зэриIэр Адыгеим и ЛIышъхьэ пчъагъэрэ къыхигъэщыгъ.
КъумпIыл Мурат республикэм ихэбзэ къулыкъухэм пшъэрылъ къафишIыгъ индустриальнэ паркым игъэпсын анахьэу анаIэ тырагъэтынэу.
Проектым иконцепцие зыфэдэщтым щытегущыIагъэх республикэм ихэбзэ къулыкъухэм-рэ компаниеу «Эрнст энд Янг» зыфиIорэм илIыкIохэмрэ тыгъуасэ зэдыряIэгъэ зэIукIэгъум. АдыгеимкIэ проектыр зыщагъэцэкIэнэу къыхахыгъэ чIыпIэр хъопсагъоу зэрэщтыр анахь шъхьаIэу компанием испециалистхэм къыхагъэщыгъ. Непэрэ мафэм ехъулIэу проектыр резиденти 179-мэ ашIогъэшIэгъонэу къаIуагъ, ахэм ащыщэу 32-мэ къэбар тедзэ къаIэкIахьэмэ ашIоигъу.
Зэхэсыгъом къызэрэщаIуагъэмкIэ, инфраструктурэ зэтегъэпсыхьагъэ зиIэ паркым ишIын едзыгъо-едзыгъоу зэтеутыгъэщт. Ащ чIыпIэу ыубытырэм тапэкIэ хагъэхъон гухэлъи щыI. Компанием къыгъэхьазырыгъэ лъэтегъэуцом зыхэплъэхэрэ ыкIи зызэхафырэ нэуж унэшъо гъэнэфагъэ зэрашIыщтыр Геннадий Митрофановым кIэухым къыIуагъ.