Планернэ зэхэсыгъоу тыгъуасэ щыIагъэм Адыгеим и ЛIышъхьэу КъумпIыл Мурат республикэм исоциальнэ-экономикэ хэхъоныгъэкIэ Адыгэ Республикэм иминистрэхэм я Кабинет хэтхэм ядокладхэм ащядэIугъ.
Зэхэсыгъом хэлэжьагъэх Адыгэ Республикэм и Къэралыгъо Совет — Хасэм и Тхьаматэу Владимир Нарожнэр, Адыгеим и Премьер-министрэу Геннадий Митрофановыр, республикэ министерствэхэм-рэ ведомствэхэмрэ япащэхэр.
Республикэм и ЛIышъхьэ зэрэхигъэунэфыкIыгъэмкIэ, Урысыем и Президентэу Владимир Путиным къыгъэнэфэгъэ пшъэрылъхэр зэрагъэцакIэрэм хабзэм ирегион къулыкъухэм гъунэ зэрэлъафырэр агъэлъэшын фае. Апэрэ чэзыоу ар зыфэгъэхьыгъэр лъэпкъ проектхэм, къэралыгъо программэхэм, республикэм хэхъоныгъэ зэришIыщт унэе программэм ягъэцэкIэн ары.
Адыгэ Республикэм и Премьер-министрэ къызэритыгъэмкIэ, мыгъэ лъэпкъ проектхэм къадыхэлъытагъэу республикэм сомэ миллиарди 3,3-рэ къыфатIупщыщт, джыдэдэм контртациер процент 47,6-рэ мэхъу. Адыгэ Республикэм социальнэ-экономикэ хэхъоныгъэ зэришIыщт унэе программэр гъэцэкIэгъэным пае къэлэ паркым дэжь псыхъоу Шъхьэгуащэ инэпкъ игъэпытэнкIэ зэнэкъокъу зэрэзэхащэрэмкIэ макъэ къагъэIугъ. Поселкэу Краснооктябрьскэм дэт АГРС-м игъэкIэжьын пае къэралыгъо экспертизэр зэхащэ.
«Лъэпкъ проектхэмрэ унэе программэмрэ ахэхьэгъэ псэуалъэхэм яшIынкIэ ыкIи ягъэкIэжьынкIэ министерствэхэмрэ ведомствэхэмрэ зэзэгъыныгъэхэр нахь псынкIэу адашIын фае. Проект-сметэ документациехэм ягъэхьазырынкIэ, проектхэр игъом аухынхэмкIэ ищыкIагъэр ашIэн фае. Инфраструктурэ, социальнэ псэуалъэхэр зэкIэ игъом атIупщынхэ фае», — къыIуагъ КъумпIыл Мурат.
Экономикэм, финансхэм, псэолъэшIыным, псауныгъэм икъэухъумэн, социальнэ ухъумэным, гъэсэныгъэм, мэкъу-мэщым, цифровизацием, культурэм яIофыгъохэм афэгъэзэгъэ министрэхэр планернэ зэхэсыгъом къыщыгущыIагъэх.
Республикэм и ЛIышъхьэ блэкIыгъэ тхьэумафэм Кощхьэблэ районым зэрэщыIагъэм икIэуххэр зэхэсыгъом щызэфихьысыжьыгъэх. Ащ министрэхэмрэ муниципальнэ образованием иадминистрациерэ пшъэрылъ афишIыгъ район гупчэм пэIудзыгъэ псэупIэхэм социальнэ фэIо-фашIэхэр нахьышIоу ащагъэцэкIэнхэм анаIэ тырагъэтынэу. Апэрэ чэзыоу ар зыфэгъэхьыгъэр къуаджэхэм ящыкIэгъэ Iэзэгъу уцхэр зычIэлъ аптекэхэр, цIыфхэр зыфэныкъо гъомылапхъэхэмрэ промышленнэ товархэмрэ зытелъ тучанхэр адэтынхэр ары. Джащ фэдэу къоджэ гъогухэм язытети, урамхэр зэрагъэнэфхэрэми, ЖКХ-м икъулыкъухэм Iоф зэрашIэрэми гъунэ алъыфыгъэным мэхьанэшхо зэриIэр зэхэсыгъом щыхагъэунэфыкIыгъ.
Пандемием епхыгъэу аштэгъэгъэ шапхъэхэр нахь къэгъэлэнлэгъэнхэ зэрэфаем республикэм и ЛIышъхьэ шъхьафэу къыщыуцугъ. Роспотребнадзорым Адыгэ РеспубликэмкIэ ипащэу Сергей Завгороднем къызэриIуагъэмкIэ, коронавирусым лъэш дэдэу зыкъызыщимыштэгъэ шъолъырхэм Адыгеир ащыщ. Ащ епхыгъэу КъумпIыл Мурат оперативнэ штабым пшъэрылъ фишIыгъ спортивнэ, культурнэ Iофтхьабзэхэм язэхэщэн, общественнэ гъэшхэным япхыгъэ шапхъэхэм ащыщхэр техыжьыгъэнхэмкIэ унашъо къыгъэхьазырынэу.
Адыгэ Республикэм и ЛIышъхьэ ипресс-къулыкъу