Саидэ Урысые зэнэкъокъум хэлажьэ

«Урысыем икIэлэпIу анахь дэгъу» зыфиIорэ зэнэкъокъум иаужырэ уцугъо къалэу Пермь мы мафэхэм щэкIо. Къэралыгъом ишъолъыр 80-мэ къарыкIыгъэ кIэлэпIухэр ащ хэлажьэх. Адыгеир къэзыгъэлъагъорэр Мыекъопэ кIэлэцIыкIу IыгъыпIэу N 60-м икIэлэпIоу Алхъо Саид. Илъэси 9 хъугъэ ащ Iоф зишIэрэр, апэрэ квалификационнэ категорие иI. ГъэрекIо зэхащэгъэ зэнэкъокъоу «Адыгеим икIэлэпIу анахь дэгъу» зыфиIорэм текIоныгъэ къыщыдихыгъагъ.
Финалым иапэрэ очнэ тур лъэныкъуитIоу зэтеутыгъ — «Моя педагогическая находка» ыкIи «Педагогическое мероприятие с детьми». Ахэм анахь дэгъоу закъыщызгъэлъэгъогъэ нэбгырэ 15-р ятIонэрэ уцугъом ихьащтых. Ахэм «Мастер-класс» къагъэлъэгъощт ыкIи «Ток-шоум» хэлэжьэщтых. «Урысыем икIэлэпIу анахь дэгъу» зыфиIорэ зэнэкъокъум изэфэхьысыжьхэр мэзаем и 14-м къэнэфэщтых.
Саидэ зэнэкъокъум гъэхъэгъэшIухэр щишIынхэу, республикэр зэрифэшъуашэу къыгъэлъэгъонэу фэтэIо.
ДЕЛЭКЪО Анет.