Дунэе ыкIи хэгъэгу зэнэкъокъухэм Адыгэ Республикэм исурэттеххэр ахэлэжьагъэх.
Урысыем исурэттех IэпэIасэхэм ясэнаущыгъэ къызыщагъэлъэгъогъэ Iофтхьабзэр Рязань щыкIуагъ. Хэгъэгум ишъолъыр 77-мэ ясурэтышI купи 100 фэдиз зэнэкъокъугъ.
ЗэхэщэкIо купыр сурэтхэм ахэплъагъ. Зэгъэпшэнхэр ышIыхи, IофшIагъэу щыIэр зэфихьысыжьыгъ. Художественнэ амалхэр агъэфедэзэ, сурэтхэр анахь дахэу зыгъэпсыгъэхэр осэшIхэм къыхахыгъэх.
— ЦIыфым узэрэфэгушIорэм сурэтхэр афэгъэхьыгъагъэх. Анахь гъэшIэгъоныр къыхэбгъэщыныр къинэу щытыгъ, — къытиIуагъ Адыгэ Республикэм исурэттеххэм я Союз ипащэу, Адыгеим изаслуженнэ журналистэу, дунаим щыцIэрыIо сурэттехэу Аркадий Кирнос. Мыекъопэ сурэттех клубэу «Лэгъо-Накъэм» хэтхэм яIофшIэгъи 10 къызэрэхахыгъэм тигъэгушIуагъ.
Сурэт пэпчъ псэ пытым фэдэу уеплъы, удэгущыIэ пшIоигъоу ухэщэтыкIы. УинэIосэ цIыфхэр, сурэтхэр зыщытырахыгъэхэ чIыпIэхэр къэпшIэжьыхэзэ, искусствэм икупкI зэрэлъыIэсыгъэхэм унаIэ теодзэ.
Тыжьыныр къыдэзыхыгъэхэр
Урысыем изэнэкъокъу хэлэжьэгъэ къалэхэм Челябинскэ исурэттеххэм апэрэ чIыпIэр афагъэшъошагъ. Адыгэ Республикэм икъэлэ шъхьаIэу Мыекъуапэ тыжьыныр къыдихыгъ.
Хэгъэгушхом Адыгеим ищытхъу щызыIэтыгъэхэм тигуапэу шъуащытэгъэгъуазэ. Ахэр: Александр Горский, Эльдарэ Мурат, Борис
Никитиныр, Татьяна Сергиенкэр, Леонид Поповыр, Владимир Романовыр, Инна Кирвяковар, Виктор Лутай.
Тисурэтттеххэм яIофшэгъи 10 анахь дэгъухэм ахалъытагъэх.
Словением къыщыхахыгъэх
Сурэттеххэм я Дунэе зэIукIэгъоу Словением щызэхащагъэм хэгъэгу 50 хэлэжьагъ.
ПэшIорыгъэшъ зэнэкъокъум щытекIуагъэхэр осэшIхэм къыхахыгъэх. ХагъэунэфыкIырэ чIыпIэхэр къызыфагъэшъошэнхэ алъэкIыщт IофшIагъэхэр 212-рэ хъущтыгъэх. А пчъагъэм щыщэу 23-р Адыгеим исурэттеххэм яех.
Адыгэ Республикэм щыщэу Артем Картавкиным иIофшIагъэу «Мэз гъэшIэгъон» зыфиIорэм тыжьыныр къыфагъэшъошагъ. Тыкъэзыуцухьэрэ дунаим идэхагъэ сурэтымкIэ къэзыIотэрэ А. Картавкиным тигъэгушIуагъ, игъэхъагъэхэм ахигъэхъонэу фэтэIо.
ШIуфэс сурэтхэр
Пэсэрэ лъэхъаным къыщегъэжьагъэу цIыфхэр зэфатхэх, сурэтхэр зэфагъэхьых. ЯмэфэкI мафэхэм, гушIуагъоу къякIугъэм, IофшIэным гъэхъагъэу щашIыгъэм, нэмыкIхэм афэгъэхьыгъэу сурэтхэмкIэ зэфэгушIох. Анахьыбэу къыхагъэщырэр ИлъэсыкIэр ары. Латинэ тхыкIэу «PF-р» тамыгъэу сурэтым тырадзэныр шэнышIу афэхъугъ. УрысыбзэкIэ ащ къикIырэр «Почтовое фото».
Аркадий Кирнос зэрилъытэрэмкIэ, Адыгеим исурэттеххэм амал гъэшIэгъонхэр агъэфедагъэх. Сурэтыр цIыфым фэбгъэхьы зыхъукIэ, шIум, дэхагъэм уягупшысэ. Унагъом ыцIэкIэ огъэхьымэ, IофшIапIэм ущытхъунэу уфаемэ, сурэт пэпчъ екIолIэкIэ хэхыгъэ къыфэогъоты.
ЧIыпIэ дахэ тыщэпсэу
Адыгэ Республикэр зыщыпсэурэ чIыпIэр дунаим щагъэшIагъо, анахь дахэмэ ахалъытэ. Къушъхьэ жэкIэфхэр, псыхъо чъэрхэр, мэз дахэхэр, лэжьыгъэ бэгъуагъэ къызыщырахыжьырэ чIыгухэр, культурэм, шIэныгъэм, спортым япхыгъэ псэуалъэхэр. Адыгеим ицIыф шIагъохэр, зэкъошныгъэр агъэпытэзэ урысхэр, адыгэхэр, къэндзал-хэр, нэмыкIхэри зы бын-унагъоу зэрэщытхэр, щыIэныгъэм ифэшъхьафырэ лъэныкъохэр сурэттеххэм яIофшIагъэ къыщагъэлъагъо.
Адыгеир къэралыгъо гъэпсыкIэ иIэу зыпсэурэр илъэси 100 зэрэхъурэр 2022-рэ илъэсым игъэкIотыгъэу хэдгъэунэфыкIыщт. МэфэкIым ехьылIэгъэ Iофтхьабзэхэр Адыгэ Республикэм культурэмкIэ и Министерствэ зэхищэщтых.
Республикэм исурэттеххэр мэфэкI зэхахьэхэм, зэнэкъокъухэм, къэгъэлъэгъонхэм чанэу ахэлэжьэщтых. Тарихъым инэкIубгъохэр, щыIэныгъэм зэхъокIыныгъэу халъагъорэр игъэкIотыгъэу искусствэм иамалхэмкIэ къагъэлъэгъощтых. Мурад шъхьаIэу яIэр щыIэныгъэр лъызыгъэкIотэрэ цIыфым ищыIэкIэ-псэукIэ гукIэ лъыIэсыхэзэ, шIум, дэхагъэм тафэзыщэрэ цIыфхэр зэрыкIохэрэ гъогур нахь нэфынэ шIыгъэныр, зегъэушъомбгъугъэныр ары.
ЕмтIылъ Нурбый.