Михаил Мишустиныр адыгэ къуаер къызщыдагъэкIырэ заводым щыIагъ

Тыгъуасэ УФ-м и Пра­­вительствэ и Тхьа­­матэу Михаил Мишустиныр Адыгеим къызэкIом адыгэ къуаеу республикэм ыцIэ чы­жьэу зыгъэIугъэр къызщыдагъэкIырэ ООО-у «Тамбовский» зыфиIорэм щыIагъ. УФ-м мэкъу-мэщ хъызмэтымкIэ иминистрэу Дмитрий Патрушевымрэ АР-м и ЛIышъхьэу КъумпIыл Муратрэ ащ игъусагъэх.


УФ-м и Правительствэ ипащэ адыгэ къуаер къызэрашIырэр зэригъэлъэгъугъ, цеххэр къыплъыхьагъэх, Iоф щызышIэхэрэм гущыIэгъу афэхъугъ.

Мы хъызмэтшIапIэм къэралыгъо IэпыIэгъур мымакIэу къыIэкIахьэ. ИкIыгъэ 2020-рэ илъэсым фэгъэкIотэнхэр къызщыдэлъытэгъэ кредит сомэ миллион 240-рэ хъоу къыра­тыгъ. Аужырэ илъэсхэм предприятиер хэпшIыкIэу агъэкIэжьыгъ, щэм гъомылапхъэхэр зыщыхашIыкIырэ ыкIи ахэр зыщызэкIоцIащыхьэрэ цеххэр ашIыгъэх, лъэхъаным диштэу шIыгъэ оборудованиякIэ агъэуцугъ. ПстэумкIи гъэкIэжьыным инвестициеу сомэ миллион 400-м ехъу пэIуагъэхьагъ.

Михаил Мишустиным къызэрэхигъэщыгъэмкIэ, фэгъэ­кIотэнхэр къызщыдэлъытэгъэ кредитхэм ятын джыри лъагъэ­кIо­тэщт. Ары пакIошъ, а лъэ­ныкъом пэIу­хьанэу мылъку тедзэ къызэратIупщыщтым тегущыIэх.

УФ-м мэкъумэщ хъызмэтымкIэ иминистрэу Дмитрий Патрушевыми фэгъэкIотэнхэр зиIэ кредитхэм инвестициехэм яп­хыгъэ IофшIэнхэр лъыгъэкIотэгъэнхэмкIэ анахьыбэу шIуагъэ къызэратырэр къыхигъэщыгъ.

ХъызмэтшIапIэр къакIухьэ­фэкIэ адыгэ къуаеу республикэм къыщыдагъэкIырэр нахьыбэ шIыгъэным, IэкIыбым кIорэми хэгъэхъогъэным япхыгъэ Iоф­хэми зэдатегущыIагъэх. Къы­хэдгъэщын, экспортым кIорэ къуаем щыщэу проценти 10-р хъызмэтшIапIэу «Тамбовскэм» къыдегъэкIы.

УФ-м и Правительствэ ипащэ щэм хэшIыкIыгъэ гъомылапхъэу республикэм къыщашIыхэрэр зэкIэри зыщызэхэугъоегъэхэ экспозициери къырагъэлъэгъугъ. Пчэныщэм хашIыкIыгъэхэри ахэм ащыщыгъэх.

АР-м и ЛIышъхьэу КъумпIыл Мурат пчэнхэр зыщаIыгъыщтхэ ыкIи пчэныщэм хэшIыкIыгъэ гъомылапхъэхэр къызщыдагъэ­кIыщтхэ комплексэу ООО-у «Мир­ный-Адыгея» зыфиIорэр къызэрэзэIуахыгъэм Премьер- министрэр щигъэгъозагъ. Ащ щабэ къэзытырэ пчэн лъэпкъэу «зааневский» зыфиIорэм фэдэу шъхьэ мини 2 мы уахътэм щаIыгъ. Джыри шъхьэ мин щырыщым ателъытагъэхэу комплекситIу ыкIи кIэлэцIыкIухэм апае шхынхэр пчэныщэм зыщыхашIыкIыщт цех атIупщынхэу ыуж итых. Проектым пстэумкIи пчэнышъхьэ мин 24-рэ зыща­Iыгъ комплекс 12 агъэуцунэу къыдыхэлъытагъ.