Социальнэ таксим икъулыкъу

Лъэпкъ проектэу «Демография» зыфиIорэм игъэцэкIэн хахьэу тиреспубликэ щыпсэухэрэм, джащ фэдэу сэкъатныгъэ зиIэхэм ыкIи IэпыIэгъу зищыкIагъэхэм ящыIэкIэ-псэукIэ нахьышIу шIыгъэнымкIэ Адыгеим Iофыгъо макIэп щызэшIуахырэр.

ГущыIэм пае, Адыгеим щып­сэухэрэм ящыIэкIэ амалхэр нахьышIу шIыгъэнхэм ыкIи сэкъатныгъэ зиIэхэм зыпари пэрыохъу къафэмыхъоу социальнэ инфраструктурэм ипсэуа­лъэхэр къызфагъэфедэнхэ алъэкIыным фэшI, цIыфхэм социальнэ фэIо-фашIэхэр афэзыгъэцэкIэрэ Комплекснэ гупчэм хахьэу зэкIэ муниципалитетхэм социальнэ таксим икъулыкъухэр ащызэхащэщтых.

АР-м IофшIэнымкIэ ыкIи социальнэ хэхъоныгъэмкIэ и Министерствэ къызэритырэмкIэ, мыщ ыпэкIэ мы къулыкъум иIофшIэн Мыекъопэ закъу зыщызэхэщэгъагъэр. Практикэм къызэригъэлъэгъуагъэмкIэ, мы фэIо-фашIэр бэмэ къызфагъэфедэ ыкIи зэкIэ районхэм мыщ фэдэ къулыкъухэр ащыгъэпсыгъэнхэмкIэ ар щысэшIу хъугъэ. «Социальнэ такси» зыфиIорэм цIыфхэр къызэрэкIэупчIэхэрэр къэзыушыхьатырэр заявкэу къатыхэрэм япчъагъ ары. ГущыIэм пае, гъэрекIо Мыекъуапэ щыIэ къулыкъум нэбгырэ мин 1,5-м ехъумэ яфэIо-фа­шIэхэр афигъэцэкIагъэх.

Социальнэ таксим икъулыкъу къызфэзыгъэфедэхэрэр сэ­къат­ныгъэ зиIэхэу курэжъыем исхэр ыкIи зипсауныгъэ зэтезыгъэ цIыфхэр арых. Ахэр зезыщэрэ машинэхэр сэкъатхэм афытегъэпсыхьагъэх, хэушъхьафыкIыгъэ дэкIояпIэхэр ахэт.

Къулыкъум иводитель ипшъэ­рылъ хахьэ сэкъатныгъэ зиIэ цIыфыр машинэм итIысхьан ыкIи икIыжьын хъумэ зэрифэшъуашэу IэпыIэгъу фэхъуныр. Зипсауныгъэ зэтезыгъэ цIыфхэм хэ­ушъхьа­фыкIыгъэ фэгъэкIотэны­гъэ­хэр яIэхэу зэращэх.

Унашъоу щыIэм къыпкъырыкIыхэзэ, цIыфыр таксим зэрежэгъэ ыкIи ащ къыкIугъэ километрэ пчъагъэм ялъытыгъэу фэIо-фашIэхэм ауасэ агъэуцу. ГущыIэм пае, такъикъ 15-рэ таксир цIыфым ежагъэ хъумэ ыпкIэ Iихыщтэп, ау зэрежагъэр такъикъ 15-м къызехъукIэ, зы та­къикъ пэпчъ соми 3,10-рэ атыщт, зы километрэ гъогууанэм сомэ 12,30-рэ тефэ.

Социальнэ таксир къызфэбгъэфедэным фэшI цIыфхэм социальнэ фэIо-фашIэхэр афэзыгъэцэкIэрэ гуп­чэм идиспетчерскэ къулыкъу ителефон утеон фае.

КIАРЭ Фатим.