Нэбгырэ 988-мэ къаратыщт

УФ-м и Президентэу Владимир Путиныр кIэщакIо зыфэхъугъэ лъэпкъ проектхэм ащыщэу «Демо­графия» зыфиIорэм къыды­хэлъы­тагъэу 2020-рэ илъэсым ищылэ мазэ и 1-м къыщыублагъэу унагъоу ящэнэрэ ыкIи ащ къыкIэлъыкIорэ сабый къызэрыхъухьэхэрэм ахэм аныбжь илъэсищым нэсыфэкIэ ахъщэ тын къафэкIонэу агъэпсын амал яIэ хъугъэ.

Адыгеим ащ къыхиубытэу исыр унэгъо 988-рэ мэхъу.

АР-м IофшIэнымкIэ ыкIи социальнэ хэхъоныгъэмкIэ и Министерствэ къызэрэщаIуагъэмкIэ, ахъщэ тыныр ным е тым ыцIэкIэ агъэпсы. ПстэумкIэ нэбгы­рэ 1033-мэ ащ пае лъэIу тхылъыр къатыгъ, зыфагъэнэфагъэр 988-р ары.

— КIэлэцIыкIур зэрэ­псэун ылъэкIыщт ахъщэ анахь макIэу Адыгеим щагъэнэфагъэм фэдиз мазэ къэс къаратыщтыр, республикэмкIэ ар сомэ 9599-рэ мэхъу, — ­къы-Iуагъ министрэм игуадзэу Ирина Ширинам.

— Унагъом гъотэу иIэр, гурытымкIэ лъытагъэу, цIыфыр зэрэпсэун ылъэ­кIыщт ахъщэ анахь макIэу республикэм ща­гъэнэфагъэм фэдитIум емыхъурэмэ (ар сомэ 20206-рэ), мыщ фэдэ ­со­циальнэ тыным кIэ­лъэIун фит.

Лъэпкъ проектым ипхырыщын пае аштэгъэ шъо­лъыр проектэу «Финан­совая поддержка семей при рождении детей» зыфиIорэр кIэлэцIыкIу къызэрыхъухьэгъэ уна­гъохэм IэпыIэгъу ягъэгъо­тыгъэным, псэукIэ амал тэрэзхэр яIэным, сабыир къызэрэхъугъэм ыпкъ къи­кIэу ягъот щыкIагъэ фэмыхъуным афытегъэпсы­хьагъ.