Адыгэ Республикэм и Къэралыгъо филармоние иэстраднэ ансамблэу «Ошъутенэм» ипчыхьэзэхахьэ онлайн къэгъэлъэгъон иIагъ.
Урысыем, IэкIыб къэралхэм ащыпсэурэ адыгэхэр нахьышIоу зэрэшIэнхэм, язэфыщытыкIэхэр гъэпытэгъэнхэм афэгъэхьыгъэ зэхахьэм тилъэпкъ орэдхэр щыжъынчыгъэх, музыкальнэ Iэмэ-псымэхэмкIэ произведениехэр къырагъэIуагъэх.
Иорданием щыпсэурэ адыгэхэм къызэIуахыгъэ Интернет-телевидениеу «Адыгэ ТВ» зыфиIорэмрэ Адыгэ Респуб-ликэм и Къэралыгъо филармоние инэкIубгъорэ онлайн-концертыр къащагъэлъэгъуагъ. Эфирым занкIэу «Ошъутенэр» къихьи, Иорданием, Германием, Израиль, Тыркуем, США-м, Европэм инэмыкI хэгъэгухэм арысхэр пчыхьэзэхахьэм еплъыгъэх.
Адыгэ Республикэм изаслуженнэ журналистэу ТIэшъу Светла-нэрэ артистэу ОелI Адамрэ зэхахьэр зэращагъ. Ансамблэм хэт артистхэр къагъэгущыIагъэх.
— Нэбгырэ миллиони 10-м нахьыбэ зэплъыгъэ концертым композиторэу ХьакIэко Алый ыусыгъэ произведениехэр, ижъырэ адыгэ орэдхэр щыIугъэх, — къытиIуагъ ТIэшъу Светланэ. — Филармонием изал цIыфхэр чIэмысыхэу дунаим къыщытэплъыгъэх. Адыгэ орэдхэмкIэ, тарихъ къэбархэмкIэ тилъэпкъэгъухэм талъыIэсыгъ. Концертыр агу зэрэрихьыгъэр тагъашIэ ашIоигъоу телефонкIэ къытеуагъэр, къытфэтхагъэр макIэп.
Адыгабзэр, лъэпкъ шэн-хабзэхэр нахьышIоу зэрагъэшIэнхэмкIэ ащ фэдэ пчыхьэзэхахьэхэр нахьыбэрэ афызэхащэ ашIоигъоу IэкIыбым щыIэ тилъэпкъэгъухэр къэлъэIуагъэх.
Адыгэ къушъхьэхэм яхьылIэгъэ орэдэу Бырсыр Абдулахьрэ ХьакIэко Алыйрэ зэдаусыгъэм уедэIузэ, тичIыналъэ идэхагъэ нэгум къыкIэуцо. Мэмэт ехьылIэгъэ орэдыри гум къегущыIыкIы.
— «Гощэгъэгъым игъыбзэ» уедэIузэ, тичIыналъэ идэхагъэ нэгум къыкIэуцо. Мэмэт ехьылIэгъэ орэдыри гум къегущыIыкIы.
— «Гощэгъэгъым игъыбзэ» концертым къыщысIуагъ. НэмыкI шIэжь орэдхэри къыхэсыдзагъэх, — игупшысэхэм тащегъэгъуазэ Адыгэ Республикэм изаслуженнэ артисткэу Даутэ Сусанэ. — Пчыхьэзэ-хахьэм ишIуагъэкIэ дунаим щыпсэурэ тилъэпкъэгъухэм, искусствэр зышIогъэшIэгъонхэм талъыIэсыгъ. ТIэшъу Светланэ зэдэгущыIэгъухэр дэгъоу зэригъэпсыгъэхэм фэшI лъэшэу тыфэраз. ОелI Адами гущыIэ фабэхэр къыфатIохэ тшIоигъу…
Ягуапэу хэлэжьагъэх
«Ошъутенэм» ихудожественнэ пащэу, Адыгэ Республикэм искусствэхэмкIэ изаслуженнэ IофышIэшхоу, композиторэу ХьакIэко Алый ансамблэм пае зэригъэфэгъэ орэдхэр дунаим щызэхахыгъэх.
Юрий Конжиныр урыс, тиреспубликэ щапIугъ. «Ошъутенэм» хэтэу адыгабзэкIэ орэдхэр къеIох. Лъэпкъхэм язэпхыныгъэ гукIэ зэрэхэлажьэрэр иIофшIагъэкIэ къегъэлъагъо.
Артистхэу Мамхыгъэ Маринэ, ПIатIыкъо Маринэ, Юрий Конжиным, Жарэкъо Руслъан, Даутэ Сусанэ, Хьазэщыкъо Мосэ агъэжъынчыгъэ лъэпкъ орэдхэм Адыгэ Республикэм ихэхъоныгъэхэр къаIуатэ.
Тэ — ты Адыг
ШIэныгъэлэжьэу, общественнэ IофышIэшхоу ЛIыIужъу Адамэ иорэдэу «Тэ — ты Адыг» зыфиIорэмкIэ онлайн-концертыр зэфашIыжьыгъ.
Адыгэу ущыIэным фэшI уиадыгабзэ, шэн-хабзэхэр пшIэнхэ, уилъэпкъ, республикэм, хэгъэгоу узыщыпсэурэм щытхъур къафэпхьызэ ущыIэн зэрэфаем ехьылIэгъэ орэдым пчыхьэзэхахьэр къыгъэбаигъэу тэлъытэ.
ЗэлъыIэсыкIэ амалхэр
Иорданием щыпсэурэ адыгэхэм къызэIуахыгъэ Интернет-телевидениеу «Адыгэ ТВ-м» тиреспубликэ иартистхэр зыхэлэжьэрэ концертхэр къыгъэлъагъохэу бэрэ къыхэкIыгъ.
Адыгэ Республикэм и Къэралыгъо орэдыIо-къэшъокIо ансамблэу «Ислъамыем» иконцерт гъэшIэгъонэу къыгъэлъэгъуагъ… Ансамблэм ихудожественнэ пащэу, Урысыем, Адыгеим янароднэ артистэу, композиторэу Нэхэе Аслъан къызэрэтиIуагъэу, ащ фэдэ пчыхьэзэхахьэхэм пIуныгъэ мэхьэнэ ин яI. Лъэпкъ зэфыщытыкIэхэр агъэпытэх, тимузыкальнэ искусствэ дунаим нахьышIоу щарагъашIэ.
Пщынэо цIэрыIоу, Адыгэ Республикэм изаслуженнэ артистэу ЛIыбзыу Аслъан итворчествэ фэгъэхьыгъэ къэгъэлъэгъоныри гъэшIэгъонэу кIуагъэ.
Зэхахьэхэм язэхэщакIохэм нэмыкI къэгъэлъэгъонхэри агъэхьазырых.
ЕмтIылъ Нурбый.