«АГУ-Адыиф» Мыекъуапэ — «Ростов-Дон» Ростов-на-Дону — 19:29 (8:16).
Щылэ мазэм и 20-м Адыгэ Республикэм испорт Унэшхоу «Кобл Якъуб» зыфиIорэм щызэдешIагъэх.
«Ростов-Доныр» Урысыем, Европэм ащыцIэрыIу, суперлигэм апэрэ чIыпIэр щиIыгъ. Гандбол клубэу «Адыифым» зэIукIэгъур дэгъоу ригъэжьагъ. Ангелина Куцеваловар тиешIакIохэм къахэщыгъ. Гъогогъуи 4 хъагъэм Iэгуаор дадзагъ. Алина Морозовам 2, Маргарита Дмитриевам 3 къэлапчъэм Iэгуаор дадзагъ.
Пчъагъэр зэрэлъыкIуатэщтыгъэр: 0:1, 1:1, 2:1, 3:2, 4:4. «РостовДоным» икъэлэпчъэIутэу Виктория Калининар цыхьэшIэгъоу ешIэщтыгъ. Метри 7 тазыр дзыгъохэр гъогогъуитIо къызэкIидзэжьыгъэх. «Адыифым» хэтхэр язакъоу къэлапчъэм екIухэу заулэрэ къыхэкIыгъ, ау хъагъэм Iэгуаор дадзэн алъэкIыгъэп.
«Ростов-Доныр» нахь псынкIэу ешIэу зеублэм, «Адыифым» имэхапIэхэр къэлъэгъуагъэх. ТиешIакIохэм ухъумэн Iофыгъохэр агъэцэкIэнхэр къяхьылъэкIы хъугъэ.
В. Бобровниковам тикъэлапчъэ Iэгуаор дахэу къызэрэдидзэрэр дгъэшIагъоу уахътэ къыхэкIыгъ.
Ирина Клименкэр ухъумакIохэм аIэкIэкIызэ, хъагъэм Iэгуаор заулэрэ дидзагъ. Анахь дахэу къэлапчъэм Iэгуаор дэзыдзагъэр Кобл Зурет ары. КъэлэпчъэIутыр ичIыпIэ зэрэщымытыр Зурет зелъэгъум, зыпэчыжьэ къэлапчъэм Iэгуаор дидзагъ. Арэу щытми, «Адыифыр» «Ростов-Доным» текIон зэримылъэкIыщтыр тшIэщтыгъэ. «Адыифыр» ыпэкIэ зилъыкIэ жъажъэу зэрешIэрэр, ошIэ-дэмышIэу къэлапчъэм екIун зэримылъэкIырэр зэIукIэгъум къыхэщыгъэх.
ЕшIэгъухэр
«Астраханочка» — «Университет» — 36:17, «Лада» — «Кубань» — 25:22, «Ставрополье» — ЦСКА — 27:41, «Звезда» — «Уфа» — 34:18.
ЧIыпIэхэр
1. «Ростов-Дон» — 24
2. ЦСКА — 24
3. «Лада» — 24
4. «Астраханочка» — 22
5. «Звезда» — 22
6. «Кубань» — 14
7. «Ставрополье» — 12
8. «Университет» — 8
9. «АГУ-Адыиф» — 6
10. «Динамо» — 4
11. «Луч» — 4
12. «Уфа» — 2.
Щылэ мазэм и 31-м «Адыифыр» «Звездам» Мыекъуапэ щыIукIэщт.