Непэ дунаир зыгъэгумэкIырэ коронавирусым пэшIуекIорэ вакцинэхэр Урысыем ишъолъырхэм зэкIэми аIэкIэлъ. УФ-м и Президентэу Владимир Путиным пшъэрылъэу къыгъэуцугъэм диштэу вакцинациер къэралыгъом жъугъэу щырагъэжьагъ. 
Адыгеим псауныгъэр къэухъумэгъэнымкIэ и Министерствэ къызэритыгъэмкIэ, мы узыр къямыутэлIэнымкIэ цIыфхэм ахалъхьэрэ вакцинэу «Спутник V» зыфиIорэм фэдэ 1642-рэ республикэм къыIэкIэхьагъ.
Непэрэ мафэм ехъу-лIэу шъолъырым щыпсэурэ нэбгырэ миным ехъумэ ар ахалъхьагъ. Мэзаем иублэгъум джыри вакцинэ 6100-рэ къаIэкIэхьанэу мэгугъэх.
Республикэм щыпсэухэу зыныбжь илъэс 18 хъугъэхэм ковидыр къямыолIэным пае прививкэ зарагъэшIын амал яI. Ащ фытегъэпсыхьэгъэ чIыпIэхэр муниципалитетхэм зэкIэми къащызэIуахыгъэх. Адыгеим икъэлэ шъхьаIэ щыпсэухэрэм урамэу Жуковскэм ыцIэ зыхьырэм иунэу N 18-м къыдыхэт студенческэ поликлиникэм вакцинэр защыхырагъэлъхьан алъэкIыщт.
Вакцинацием мэхьанэу иIэм, мы узым пэшIуекIогъэным фэшI шIэгъэн фаехэм, нэмыкI лъэныкъохэм афэгъэхьыгъэ тхыгъэ я 2-рэ нэкIубгъом ижъугъотэщт.