Сомэ 483881-рэ хъущт

2021-рэ илъэсэу къихьагъэм ны мылъкум къыщыдэлъытэгъэ ахъщэр индексацие ашIыгъ. Джы ар сомэ 483881-рэ зэрэхъущтыр.

Апэрэ сабый къызэрыхъухьэгъэ унагъоу ны мылъкур къызэратыгъэхэм ятIонэрэр къызафэхъукIэ ащ сомэ 155550-рэ къафыхагъахъо. Зэхэубытагъэу къатефэрэр сомэ 639431,8-рэ мэхъу. Ны мылъкум щыщ Iахь зыгъэфедагъэхэм къафэнэгъэ ахъщэри мы илъэсым индексацие ашIыгъ.

Шъугу къэдгъэкIыжьын, 2020-рэ илъэсым икъихьагъум къыщегъэжьагъэу мы къэралыгъо IэпыIэгъур къыуатыным пае лъэIу тхылъ птынэу ищыкIэгъэжьэп. УФ-м ПенсиехэмкIэ ифонд испециалистхэм, кIэлэцIыкIур къызэрэхъугъэм фэгъэхьыгъэ къэбарэу ЗАГС-м къытыгъэм къыпкъырыкIыхэзэ, тхылъхэр агъэхьазырых.

Джащ фэдэу 2020-рэ илъэсым имэлылъфэгъу мазэ къыщегъэжьагъэу сертификатыр тхьапэм тетэу къатыжьырэп. Тхылъыр электроннэ шIыкIэм тетэу агъэ­псы, ар зэрэхьазырыр ным «иунэе кабинет» е къэралыгъо фэIо-фашIэхэм япортал къырагъахьэ.

Унагъоу кIэлэцIыкIур ыпIунэу зыштагъэхэм мы шапхъэхэр анэсыхэрэп, ахэм ар къэзыушыхьатырэ тхылъхэри, лъэIу тхылъыри ежьхэм атынхэ фае.

Ны мылъкум фэгъэхьыгъэ программэр 2026-рэ илъэсым итыгъэгъазэ и 31-м нэс лъагъэкIотагъ. Ахъщэу къыдэлъытагъэр унагъом зэригъэфедэщтым пIэлъэ гъэнэфагъэ иIэп.

Программэр зыщыIэм къыщыублагъэу Адыгеим ис унэгъо 35281-мэ ны мылъкур къаратыгъ. Ахэм ащыщэу 27647-мэ ахъщэр агъэфедэгъах. 2007-рэ илъэсэу ар зыщыIэм къыщегъэжьагъэу ащ къыщыдэлъытагъэу къэралыгъо IэпыIэгъоу Адыгеим щатыгъэр сомэ миллиарди 10-м шъхьарэкIы.

УФ-м ПенсиехэмкIэ ифонд и Къутамэу АР-м щыIэм ипресс-къулыкъу