«Русичи» Курск – «Динамо-МГТУ» Мыекъуапэ – 74:83 (17:25, 15:15, 22:24, 20:19).
Щылэ мазэм и 16-м Курскэ щызэдешIагъэх.
«Динамо-МГТУ»: Чичайкин – 4, Суслов, Александров – 10, Гапошин – 17, Чаленко, Милютин – 8, Еремин – 15, Князев – 14, Кочнев – 15.
Апэрэ едзыгъор 25:17-у «Динамо-МГТУ-м» къызехьым, ешIэгъум къырыкIощтыр зыIэкIигъэкIыгъэп.
Баскетболым хэгъозагъэхэу Илья Александровым, Артем Гапошиным зэхэщэн Iофыгъохэр дэгъоу агъэцэкIагъэх. Хъурджанэм Iэгуаор радзэнымкIэ щысэшIу къагъэлъэгъуагъ.
Анахьэу тызыгъэгушIуагъэхэм ащыщых Николай Ереминыр, Максим Князевыр, Юрий Кочневыр. Хъурджанэм пэблагъэ зыхъухэкIэ пхъашэу мэбанэх. Хъагъэм Iэгуаор радзэнымкIэ шIыкIэшIухэр къагъоты.
«Динамо-МГТУ-м» итренер шъхьаIэу, Адыгэ Республикэм изаслуженнэ тренерэу Андрей Синельниковым къызэрэтиIуагъэу, тиешIакIохэр псынкIэу зэгурэIох, пытагъэ къызыхагъафэ.
ЗэIукIэгъур аухынкIэ такъикъи 3-рэ нэгъэупIэпIэгъу 30-рэ къызэнэм, 76:65-у «Динамэр» текIощтыгъ.
«Русичи» пчъагъэм емызэгъэу ыпэкIэ къилъыгъ, хъагъэм Iэгуаор редзэ – 70:76, къэнагъэр такъикъи 2. БаскетболымкIэ ар макIэп. Зы такъикъ къызэнэм, пчъагъэр 72:76-рэ хъугъэ.
НэгъэупIэпIэгъу 30 къэнагъэу Юрий Кочневым тазыр дзыгъуи 2-р егъэцакIэ, хъагъэм Iэгуаор зэ редзэ. «Русичым» иешIакIохэм ащыщ очкоуи 3 дзыгъор егъэцакIэ, ау хъагъэм Iэгуаор ригъэфагъэп, 74:78-рэ пчъагъэр.
«Русичым» иухъумакIо икIэрыкIэу шапхъэхэр еукъох. Тазыр дзыгъокIэ А. Гапошиным пчъагъэм хегъахъо – 74:80. «Русичыр» гуIэм хэтэу ыпэкIэ елъы шъхьае, хъагъэм Iэгуаор ридзэн ылъэкIырэп. А. Гапошиным тазыр дзыгъокIэ хъагъэм Iэгуаор зэ редзэ – 74:81-рэ.
Аужырэ нэгъэупIэпIэгъухэри рэхьатыгъэхэп. «Русичи» Iэгуаор IэкIагъэхьагъэп, Юрий Кочневым хъурджанэм Iэгуаор ридзэнэу игъо ифагъ – 74:83-рэ.
Курскэ иешIакIохэр ауж къинэрэ командэхэм ащыщэп. Уащытхъунэу зэнэкъокъум хэлэжьагъэхэм ацIэхэр къетэIох. Алексей Макаровым хъагъэм Iэгуаор анахьыбэрэ ридзагъ, очко 22-рэ икомандэ къыфихьыгъ. Максим Воитовым 13, Илья Луппэ 9.
«Динамо-МГТУ-р» зэгурыIоныгъэ хэлъэу кIэухыми ешIагъ, хъагъэм Iэгуаор заулэрэ ридзи, текIоныгъэр къыдихыгъ.
ЧIыпIэхэр зэтэгъапшэх
Я 13-рэ ешIэгъухэм ауж суперлигэм иятIонэрэ куп хэт баскетбол командэхэр чIыпIэу зыдэщытхэр зэтэгъапшэх.
1. «Тамбов» — 24
2. «Барнаул» — 23
3. «Динамо-МГТУ» — 21
4. «Металлург» — 21
5. «Чебоксарские Ястребы» — 20
6. «Русичи» — 18
7. «ЧелБаскет» — 18
8. «Динамо» С – 17
9. «Нефтехимик» — 16
10. «МицуБаскет» — 15
11. «Барс-РГЭУ» — 14.
Щылэ мазэм и 27-м «Динамо-МГТУ-р» Чебоксары щыIукIэщт чIыпIэ командэу «Чебоксарские Ястребы».