Щагу 25-рэ зэтырагъэпсыхьащт

Фэтэрыбэу зэхэт унэ 29-рэ зэзыпхырэ щагу 25-рэ Мыекъуапэ щызэтырагъэпсыхьанэу агъэнэфагъ. Ащ «ШэпхъэшIухэм адиштэрэ къэлэ щыIакIэ гъэпсыгъэныр» зыфиIорэ федеральнэ программэм къыдыхэлъытагъэу федеральнэ, шъолъыр ыкIи чIыпIэ бюджетхэм къахэхыгъэ сомэ миллион 80 пэIуагъэхьащт.

Мыекъопэ къэлэ администрацием псэупIэ-коммунальнэ хъызмэтымкIэ ыкIи зэтегъэпсыхьанымкIэ и ГъэIорышIапIэ къызэрэщаIуагъэмкIэ, кIэлэцIыкIу джэгупIэхэмрэ спорт псэуалъэхэмрэ щынэгъончъэу гъэпсыгъэнхэм анахьэу анаIэ тырагъэтыщт.

— Илъэситф хъугъэу фэтэрыбэу зэхэт унэу Мыекъуапэ дэтхэм ящагухэр тэгъэкIэжьых. Iофэу ащызэшIотхыщтхэм ягъэнэфэнкIи, гъэцэкIэжьынхэр зэрэкIощтхэмкIи цIыфэу ащыпсэухэрэм тызэряупчIыжьырэр, яшIоигъоныгъэхэр къызэрэдэтлъытэхэрэр анахь шъхьаI. Къэлэдэсхэр ары тшIэ­­щтыр къэзыIорэри, ящагу зэрэгъэпсыгъэщтыр къыхэзыхыхэрэри, — къыIуагъ къалэм имэрэу Андрей Гетмановым.

Унэхэм ачIэсхэм зэIукIэ ашIышъ, щагур зэрашIыщтым зэдытегущыIэх. Ащ шIоигъоныгъэу къыщаIуагъэхэр, предложениеу къахьыгъэхэр къыдалъытэзэ, мылъкоу пэIуагъэхьащтым телъытагъэу, проектыр зэхагъэуцо.

Iэрыфэгъу къэлэ щыIакIэр гъэпсыгъэ­ным фэгъэхьыгъэ программэм ипхырыщын АР-м и ЛIышъхьэу КъумпIыл Муратрэ къалэм имэрэу Андрей Гетмановымрэ ашъхьэкIэ анаIэ тет. ГъэцэкIэжьын Iофэу агъэнэфагъэхэр 2021-рэ илъэсым игъэмафэ ыкIэм нэс аухынэу ары зэрэщытыр.

Мыекъопэ къэлэ администрацием ипресс-къулыкъу къызэрэщаIуагъэмкIэ, блэкIыгъэ 2020-рэ илъэсым федеральнэ программэм къыдыхэлъытагъэу щагу 23-рэ зэтырагъэпсыхьагъ. Ахэм фэтэрыбэу зэхэтэу унэ 33-рэ зэрапхы.