Игъом зэримыгъэцэкIагъэм къыхэкIыкIэ
Красногвардейскэ районым щыпсэурэ хъулъфыгъэм иавтомобиль ыгъэфедэн фимытэу унашъо зашIым, ащ къыкIэлъыкIоу тазыр зытыралъхьэ нэуж ары чIыфэр къызипщыныжьыгъэр.
Мы муниципалитетым щыпсэурэ хъулъфыгъэм административнэ хэбзэукъоныгъэу ышIыгъэхэм къапкъырыкIызэ хьыкум пристав-гъэцэкIакIом Iоф пчъагъэ къызэIуихыгъ. Хэбзэгъэуцугъэм къыдилъытэрэ лъэныкъохэр зимыгъэцакIэкIэ ащ къыкIэлъыкIон ылъэкIыщтыр, нахь пытагъэ хэлъэу зэрагъэпщынэщтыр хъулъфыгъэм гуригъэIуагъ.
Ау тазырхэр ежь-ежьырэу къызщипщыныжьын ылъэкIыщт пIалъэу фагъэнэфагъэм ар шъхьадэкIыгъ. Ащ къыхэкIыкIэ хьыкум приставым унашъо ышIыгъ чIыфэ зытелъым иавтомобилэу ГАЗ 33104-м арест тырилъхьанэу, Iофэу къыфызэIуахыгъэхэм ягъэцэкIэн пэIухьэрэ ахъщэр къырагъэпщынынэу.
Ащ ыуж ары ныIэп хъулъфыгъэм «зыкъызишIэжьыгъэр» ыкIи чIыфэр къызипщыныжьыгъэр.
ЧIыфэ шъутелъымэ игъом зэжъугъэшIэнэу зыкъышъуфегъазэ хьыкум приставхэм я Федеральнэ къулыкъу и ГъэIорышIапIэу Адыгеим щыIэм. Ащ фэгъэхьыгъэ къэбарым шъущыгъозэнэу е чIыфэу шъутелъыр шъупщыныжьынэу шъуфаемэ, ГъэIорышIапIэм иофициальнэ сайтэу https://r01.fssp.gov.ru шъуихьан ыкIи амалэу къытырэр къызфэжъугъэфедэн шъулъэкIыщт.
Тазырхэр къыпщыныжьыгъ
Теуцожь районым щыпсэурэ хъулъфыгъэм гъогурыкIоным ишапхъэхэр пчъагъэрэ зэриукъуагъэхэм къыхэкIэу сомэ мин 30-м ехъу зытефэрэ тазыр 28-рэ къытыралъхьагъ.
Ащ епхыгъэу хьыкум приставым Iофхэр къызэIуихыгъэх, чIыфэр къыпщынын зэрэфаемкIэ хъулъфыгъэм макъэ ригъэIугъ.
ГъогурыкIоныр щынэгъончъэнымкIэ Къэралыгъо автоинспекцием къытырилъхьэгъэ тазырхэм джыри ахэмыхъоным фэшI машинэр зием чIыфэр къыпщыныжьыгъ, ащкIэ Iофыр зэфэшIыжьыгъэ хъугъэ.
Хьыкум приставхэм я Федеральнэ къулыкъу
и ГъэIорышIапIэу Адыгеим щыIэм ипресс-кулыкъу.