Сакъыныгъэ къызхэжъугъаф!

Ом изытет къызэрэучъыIыгъэм имызакъоу, урамхэм осыр къызэратырилъхьагъэм (анахьэу районхэм) къыхэкIэу Адыгеим и Къэралыгъо автоинспекцие гъогум нахь щысакъынхэу водительхэм зафегъазэ.

Нахь пасэу шIункI къызэрэ­хъурэм дакIоу, республикэм чIыпIэ-чIыпIэу гъогухэр Iумыл щэхъух. Ащ пае блэгъащэу уапэ ит машинэм уекIуалIэ хъущтэп, узэрэчъэрэм илъэшыгъэ нахь къыщыбгъэкIэн фае. Мыщ фэдэ уахътэм зекIокIэ къулайныгъэр къэбгъэлъэгъонэу, ошIэ-дэмышIэу автомобилыр къэбгъэуцунэу щытэп.

Зыщышъумыгъэгъупш, гъогур Iумыл зыхъукIэ хъугъэ-шIагъэ ухэфэным ищынагъо къызэрэуцурэр.

Общественнэ транспортыр къызыщыуцурэ чIыпIэхэм, гъогу зэхэкIыпIэхэу машинабэ зыщыкIохэрэм ыкIи нэфрыгъуа­зэхэм апашъхьэ анахьэу са­къыныгъэ къызщыхэжъугъаф!

Водительхэм ямызакъоу, лъэсрыкIохэми мы лъэхъаным анахьэу ягулъытэ агъэIорышIэн фае. Машинэхэр зэрыкIохэрэ гъогур зэпышъучы зыхъукIэ бгъу пстэумкIи зышъуплъыхь. Шъуищыгъынхэм къэнэфырэ пкъы­гъохэр ахэшъулъхьанэу зыщы­шъумыгъэгъупш!