Проценти 6,3-кIэ къаIэтыгъэх
IофшIапIэм Iумытыжь пенсионерэу страхованиемкIэ пенсие къызэратыхэрэм проценти 6,3-рэ къафыхэхъуагъэу илъэсэу къихьагъэм ищылэ мазэ и 1-м къыщыублагъэу къаратынэу рагъэжьагъ.
2021-рэ илъэсым унэе пенсионнэ коэффициентэу нэбгырэ пэпчъ иIэм ыуасэ сомэ 98-рэ чапыч 86-рэ хъущт, страхованиемкIэ пенсием тегъэхъуагъэу ахъщэ тын гъэнэфагъэу къатыщтыр (фиксированная выплата к страховой пенсии) сомэ 6044-рэ чапыч 48-м нэсыщт.
Индексациер зынэсыгъэхэр IофшIапIэм Iумытыжь пенсионерэу страхованиемкIэ пенсие зыфагъэнэфагъэхэр ары. Адыгеим исэу зипенсие къыхэхъуагъэр нэбгырэ мин 93-рэ фэдиз мэхъу. Нэбгырэ пэпчъ къыфыхэхъуагъэр зэфэшъхьаф.
Пенсионерэу IофшIэпIэ чIыпIэм къыIукIыжьырэм ащ IотыфэкIэ индексацие зэрашIыгъэри къыдалъытэзэ страхованиемкIэ пенсиер къыфыкIалъытыкIыжьыщт. 
УищыкIагъэр къызэрэзыIэкIэбгъэхьащтыр
ЦIыфым IофшIэгъэ илъэсэу иIэр зыщыгъэнэфэгъэ тхылъэу электроннэ шIыкIэм тетэу гъэпсыгъэм (электронная трудовая книжка)
IофшIапIэм зыщаштагъэри, иIэнатIи, нэмыкI чIыпIэ зыщыкIуагъэри, къызщыIукIыжьыгъэри, а зэхъокIыныгъэхэм лъапсэ афэхъугъэри итхагъэх.
НахьыпэкIэ щыIэгъэ тхылъым щыгъэнэфэгъагъэр зэкIэ мыщи ит.
IофшIэгъэ илъэсхэм афэгъэхьыгъэ къэбарыр зищыкIагъэм УФ-м ПенсиехэмкIэ ифонд иинтернет нэкIубгъо щигъэпсыгъэ «унэе кабинетым» щызэригъэшIэн ылъэкIыщт. Ащ пае «Заказать справку о трудовой деятельности» зыфиIорэм ихьан фае. Къэралыгъо фэIо-фашIэхэм япортал ыгъэфедэми
хъущт.
Къэбарыр зэрыт тхылъым (выписка) ПенсиехэмкIэ фондым иэлектроннэ IэпэкIадзэ иIэщт. Ар компьютерэу е телефонэу интернет нэкIубгъор къызщызэIуихыгъэм къытенэнэу ышIын ылъэкIыщт, электроннэ почтэмкIэ ыгъахьынэу е къыдихыпэнэу амали иI.
ЦIыфым иIофшIэгъэ илъэсхэр зыщыгъэнэфэгъэ тхылъэу электроннэ шIыкIэм тетэу гъэпсыгъэм 2020-рэ илъэсым къыщегъэжьагъэу зэхъокIыныгъэу фэхъугъэхэр ары итхэгъэщтыр. НахьыпэкIэ хъугъэр «трудовой книжкэжъэу» иIагъэм къыдэнэжьыщт. Арышъ, электроннэ шIыкIэм техьажьыгъэхэм адрэ тхылъыр радзыжьы хъущтэп.
УФ-м ПенсиехэмкIэ ифонд и Къутамэу АР-м щыIэм ипресс-къулыкъу