Адыгэ Республикэм и Къэралыгъо академическэ къэшъокIо лъэпкъ ансамблэу «Налмэсым» шэнышIу зэрэфэхъугъэу, 2021-рэ ИлъэсыкIэм фэгъэхьыгъэ концерт къытыгъ.
«Налмэсым» ипащэхэм зэлъыIэсыкIэ амалхэр агъэфедагъэх. Онлайн шIыкIэм тетэу эфирым занкIэу къихьэхи, мэфэкI концертыр игъэкIотыгъэу зэхащагъ.
Лъэпкъ искусствэр зышIогъэшIэгъонхэр, «Налмэсыр» зыгу рихьыхэрэр нэбгырэ мини 10 фэдиз хъухэу концертым еплъыгъэх.
Къашъохэу «ЗэфакIор», «Анатолием ищэрджэс къашъо», «Ислъамыер», «ЛъэпэчIасэр», нэмыкIхэри артистхэм къашIыгъэх. «Ижъырэ зэфакIор», «Адыгеим иныбжьыкIэхэр», «Тыргъэтаор», фэшъхьафхэри искусствэм пылъхэм якIасэх.
Лъэпкъ къашъохэм лIэужхэр зэрапхы, тарихъым инэкIубгъохэм уащагъэгъуазэ. Кавказ щыпсэурэ лъэпкъхэм якъэшъо зэхэтхэр дунаим щашIэх. «Налмэсым» лъэпкъ искусствэм идэхагъэ, ибаиныгъэ къашъомкIэ къеIуатэ.
«Адыгэ уджхэм» уяплъызэ, пэсэрэ лъэхъаным гукIэ зыфэогъазэ. Адыгэмэ ятарихъ, яшэн-хабзэхэр, шIулъэгъу къабзэм икъежьакIэ, зэфэнэгушIохэу зэIукIэгъэ ныбжьыкIэхэр къашъом ыбзэкIэ зэрэзэдэгущыIэхэрэр, лъэпкъ къашъор щыIэныгъэм зэрэщыщыр артистхэм узыIэпищэу къагъэлъагъо.
«Налмэсым» иконцерт еплъыгъэхэм ягупшысэхэр зэфэпхьысыжьмэ, ансамблэ цIэрыIор щыIэныгъэм иIотакIоу щыт. Къашъо пэпчъ псэ къыпызыгъэкIэрэ артистхэм яIэпэIэсэныгъэ искусствэ лъагэм зэрэдиштэрэм уегъэгушIо.
— 2021-рэ илъэсым, мэкъуогъум и 17-м «Налмэсыр» зызэхащагъэр илъэс 85-рэ хъущт, — къытиIуагъ тиансамблэ цIэрыIо ихудожественнэ пащэу, Абхъазым, Пшызэ шъолъыр язаслуженнэ артистэу, Адыгэ Республикэм инароднэ артистэу Хъоджэе Аслъан. — ТимэфэкI зыфэтэгъэхьазыры. НахьыпэкIэ «Налмэсым» къышIыщтыгъэ къашъохэр, кIэу дгъэуцухэрэр тиконцертхэм ахэдгъэхьащтых.
«Налмэсым» иветеранхэм, искусствэм пылъхэм, хэбзэ къулыкъушIэхэм яеплъыкIэхэр къыдалъытэхэзэ, ансамблэм ирепертуар зэхъокIыныгъэхэр фашIых.
Быщтэкъо Азэмат адэуджы
«Тыргъэтаор», «ЗэфакIор», «ШIуфэс къашъор», нэмыкIхэу цIыфхэм бэшIагъэу агу рихьыгъэхэр «Налмэсым» тапэкIи къышIыщтых. Ащ дакIоу, Адыгэ Республикэм изаслуженнэ артистэу, Къыблэ шъолъырым иорэдыIо цIэрыIоу Быщтэкъо Азэмат «Налмэсым» иоркестрэ хэтэу лъэпкъ мэкъамэхэр музыкальнэ Iэмэ-псымэхэмкIэ къыригъэIуагъэх, адыгэ орэдхэр ИлъэсыкIэм фэгъэхьыгъэ концертым къыщиIуагъэх, къыщышъуагъ. А. Быщтэкъор нэмыкI концертхэм ащытлъэгъущт.
Залым цIыфхэр чIэмысыгъэхэми, концертым эфирым щеплъыгъэхэр зэхэщакIохэм, артистхэм Iэгу афытеуагъэх, «тхьашъуегъэпсэу» араIожьыгъ.
«Налмэсым» имэфэкI мафэ зыфегъэхьазыры. Къашъоу къышIыщтхэм якъыхэхын пащэхэм Iоф дашIэ. ЩыIэныгъэр зыпкъ иуцожьмэ, концертхэр, Адыгеим, Урысыем яшъолъырхэм, IэкIыб хэгъэгухэм къащитыщтых.
ЕмтIылъ Нурбый.