АР-м и Къэралыгъо Совет – Хасэм идепутатэу Болэкъо Мыхьамэт Джэджэ район сымэджэщым автомобилэу газель ритыгъ. Гъубдж мафэм ащ иIункIыбзэхэр врач шъхьаIэм ритыжьыгъэх. 
— Охътэ къинэу тызыхэтым депутат пстэумэ цIыфэу районым исхэм, анахьэу медицинэм иIофышIэхэм, лъэшэу яшIуагъэ арагъэкIы, — къыIуагъ народнэ депутатхэм ярайон Совет партиеу «Единэ Россием» ифракциеу хэтым ипащэу Алла Самохваловам. – Лъэшэу тигуапэ ащ фэдэу гупыкI зиIэу, автомобиль шIухьафтынэу ашIыным фэхьазыр цIыфхэр зэрэтиIэхэр.
Болэкъо Мыхьамэт Адыгеим щызэлъашIэрэ меценат. Депутат Iофым зыфэгъэзагъэм къыщыублагъэу ащ мызэу, мытIоу ичIыпIэгъухэм IэпыIэгъу афэхъугъ. Джэджэ районым социальнэ мэхьанэ зиIэ Iофхэр щызэшIохыгъэнхэм, гущыIэм пае, спорт площадкэхэм, кIэлэцIыкIу джэгупIэхэм яшIын, чIыпIэхэм язэтегъэпсыхьан еджапIэхэм, кIэлэцIыкIу IыгъыпIэхэм, гъогухэм ягъэцэкIэжьын иIахьышхо хелъхьэ, цIыфэу исхэм ящыкIагъэмэ транспорт ареты, мэфэкI зэхахьэхэм язэхэщэнкIэ адеIэ. Нахьыжъэу районым исхэм анахьыбэу ынаIэ атет.
— АР-м и ЛIышъхьэу, партием ишъолъыр къутамэ и Секретарэу КъумпIыл Мурат пэщэныгъэ дызэрихьэзэ, коронавирусым зимыушъомбгъуным фытегъэпсыхьэгъэ IофшIэнышхо республикэм щызэшIохыгъэ мэхъу, — къыхигъэщыгъ Болэкъо Мыхьамэт. — Арэу щытми зэпахырэ узэу дунаир зэлъызыкIугъэм медицинэм иIофышIэхэм апашъхьэ пшъэрылъышхохэр къегъэуцух, атегъэуагъэ хъугъэр бэ. Автомобилэу Джэджэ район сымэджэщым естыгъэм яуахътэ къызэтыригъэнэнэу, яIофшIэн нахьышIу хъуным фэIорышIэнэу сыщэгугъы.