Адыгеим и ЛIышъхьэу КъумпIыл Муратрэ Адыгэ Республикэм гъэсэныгъэмрэ шIэныгъэмрэкIэ иминистрэу КIэрэщэ Анзауррэ зэIукIэгъу зызэдыряIэм илъэсыкIэ зыгъэпсэфыгъохэм ауж еджэныр зырагъэжьэжьыкIи санитар шапхъэхэр къыдалъытэнхэ зэрэфаем тегущыIагъэх.
Шъугу къэтэгъэкIыжьы республикэ оперативнэ штабым иунашъокIэ я 5 – 8-рэ, я 10-рэ классхэм арысхэмрэ кIэлэцIыкIухэм гъэсэныгъэ тедзэ языгъэгъотырэ организациехэм якIуалIэхэрэмрэ тыгъэгъазэм и 14-м къыщегъэжьагъэу и 31-м нэс пэIудзыгъэ шIыкIэм тетэу зэрэрагъэджагъэхэр. Тыгъэгъазэм и 24-м къыщегъэжьагъэу и 31-м нэс республикэм икIэлэеджакIохэр зэкIэ ащ фэдэ шапхъэм тырагъэхьагъэх. Ащ фэдэ унашъо зыкIаштагъэр коронавирусым зимыушъомбгъуным пай.
Гурыт еджапIэхэр тIэкIу-тIэкIузэ зэсэгъэ IофшIакIэм техьажьых. Адыгэ Республикэм гъэсэныгъэмрэ шIэныгъэмрэкIэ иминистрэ къызэриIуагъэмкIэ, щылэ мазэм и 11-м къыщегъэжьагъэу пэублэ, я 9-рэ, я 11-рэ классхэм арысхэр еджапIэм кIощтых. Я 5 – 8-рэ, я 10-рэ классхэм арысхэр щылэ мазэм и 16-м нэс пэIудзыгъэ шIыкIэм тетэу еджэщтых. Республикэм икIэлэеджэкIо пстэуми щылэ мазэм и 18-м гурыт еджапIэхэм къарагъэгъэзэжьынэу рахъухьэ.
Адыгеим и ЛIышъхьэ Роспотребнадзорым игъо ылъэгъугъэхэр зэрагъэцакIэрэм гъунэ зэрэлъафырэр нахь агъэлъэшынэу, кIэлэеджакIохэр щынэгъончъэу рагъэджэнхэу, санитар-эпидемиологие шапхъэхэм адиштэу кIэлэцIыкIухэм ягъэшхэн зэхащэнэу пшъэрылъ афишIыгъ.
ЫпэкIэ зэрэщытыгъэм фэдэу гурыт еджапIэхэм кIэлэеджакIохэм ятемпературэ ащашын фае. Гъэсэныгъэ языгъэгъотырэ организациехэм яадминистрациехэм зы классым исхэр кабинет шъхьафхэм ащегъэджэгъэнхэмкIэ, игъом ахэр дезинфекцие шIыгъэнхэмкIэ, жьы къабзэ арыгъэхьэгъэнымкIэ ищыкIэгъэ амалхэр зэрахьанхэ фае. Джащ фэдэу гурыт еджапIэхэм ягъэшхапIэхэм Iоф ащызышIэхэрэми, кIэлэеджакIохэми шэпхъэ гъэнэфагъэхэр къыдалъытэнхэ фае.
Адыгэ Республикэм и ЛIышъхьэ ипресс-къулыкъу