Зигугъу къэсшIымэ сшIоигъор непэрэ лъэхъаным илIыхъужъхэу медицинэм иIофышIэхэр ары. 
Мы илъэсэу икIырэм иIоныгъо мазэ дунаир зэлъызыкIугъэ коронавирусыкIэм сэри сырихьылIи, ащ «ишIушIэкIэ» Мыекъопэ къэлэ сымэджэщым щагъэпсыгъэ госпиталым сычIэфэгъагъ. СиIофхэм язытет уигъэгушIонышхоу щытыгъэп, къин слъэгъугъ, ау слъакъо сыкъытеуцожьыгъ. Ар сэрэп зишIушIагъэр, пстэумэ апэу врачэу къысэIэзагъэхэр ары, ащ ыуж укъикIымэ, медсестрау, медбратэу ахэм къатхыгъэр къысэзышIэфыгъэхэр, нэмыкIэу сымаджэхэм къадекIокIэу сызчIэфэгъэ отделением чIэтхэр ары.
Хэты сыд еIоми, сэ сшъхьэкIэ сыушэтыгъэ тимедицинэ иIофышIэхэр акIуачIи, агуи, апси халъхьэзэ цIыфхэм IэпыIэгъу зэрафэхъухэрэр. КъызэрэсIуагъэу, Iоныгъор ары сызчIэфагъэр госпиталым, ау ащыгъуми сымаджэу чIэлъыгъэр бэ. Мэзэ пчъагъэ хъугъэу вирусым ущызыухъумэрэ шъошэ зэтегъэпытахьыгъэшхохэр ащыгъэу ащ Iоф щызышIэхэрэр зэрэпшъыгъагъэхэр, кIуачIэу яIэр гъунэм зэрэнэсыгъагъэр нафэ, ау зыпарэкIи ар къызхамыгъэщэу япшъэрылъхэр агъэцакIэщтыгъэх. Зы нэбгырэ иIоф Iэпэ-дэлэл ышIыгъэу тлъэгъугъэп.
Мы зэпахырэ узыр кIэ, икъу фэдизэу зыфэдэр зэрамыгъэшIагъэуи аIо, ау иIофшIэн хэшIыкI фыримыIэу, цIыфым рипэсыщтыр ымышIэу зы врач тырихьылIагъэп. Пчыхьэми пчэдыжьыми тэ къытэIэзэнэу къытэпхыгъэ врачыр къытхахьэщтыгъ, нахь хьылъэхэм непэ пчъагъэрэ ашъхьагъ къихьэщтыгъ.
Юсуп Байзэт врачэу сэ къысэIэзагъ. Коронавирусыр къытхэмыхьэфэкIэ хирургэу Iоф ышIагъ, узыр къызежьэм, ащ узэребэныщтым зыфигъэсэжьыгъ. Илъэс 29-рэ ныIэп ыныбжьыр, щыIэныгъэр ыпэ илъ. Арэу щытми, исэнэхьат къыфигъэуцугъэ пшъэрылъыр егъэцакIэ, уз мэхъаджэр къеолIэным ищынагъо шъхьащытэу Iоф ешIэ.
«ЗэкIэри дэгъу хъущт, шъугу шъумыгъэкIод» ренэу къытиIощтыгъ. Ар зызэхэтхыкIэ, тызэтеуцожьынышъ, тиунагъохэм тызэрахэхьажьыщтым тицыхьэ телъ къэхъущтыгъ. Тыпфэраз, Байзэт, тхьауегъэпсэу!
Ащ ыужым кардиологэу Даур Мадинэ къысэIэзэнэу хъугъэ. Бзылъфыгъэ пIокIэ цIыкIоу, шъабэу, макIэу гущыIэу, ау нэщх-гущх зэпытэу щыт. Iэзэгъу уцхэм анахьэу ар къызэрэтIущхыпцIэрэм нахьыбэу ишIуагъэ къытэкIыгъ сшIошIы. Коронавирус мэхъаджэм уз гъэтIылъыгъэу тиIагъэхэр къыгъэбырсырыгъэхэу, къин тыхэтыгъ. Мадинэ упчIэхэр бэу теттакъощтыгъэх. Хэзыгъэ имыIэу зэкIэми джэуап зэхэугуфыкIыгъэ къаритыжьыщтыгъ, щэIэгъэшхо къытфыриIагъ. Шъхьащэ фэтэшIы тиврач шъэбэ цIыкIу!
Къытхахьэщтыгъ врач ныбжьыкIэу Ангелина Гутаревари. Ар тэ къытэпхыгъэу къытэIазэхэрэм ащыщыгъэп, дежурствэ иIэ зыхъукIэ, тиIофхэм язытет зыщигъэгъозэнэу къычIахьэщтыгъ. Ау ренэу ыгу еты-гъэу къытэдэIущтыгъ, упчIэхэм джэуапхэр къаритыжьыщтыгъэх. Зыгорэм IэпыIэгъу ищыкIагъэмэ Iэпэдэлэл ышIыгъэп, нэужыми ынаIэ тыригъэтыщтыгъ.
Сэ сшъхьэкIэ згъэшIагъощтыгъэр нэбгырэ пэпчъ раIон, зэрагъэрэхьатын къызэрагъотыщтыгъэр ары. Ащ фэдэу гукIэгъу хэлъэу, дахэу, шъабэу къызыбдэгущыIэхэкIэ, угу къыдащаещтыгъ, узым уебэны пшIоигъоу, кIочIэ тIэкIоу уиIэр епхьылIэщтыгъ. Ащ тетэу зы нэбгырэп, нэбгыритIоп ахэм сэ слъэгъузэ узым къыIэпахы-
гъэр, щыIэныгъэм къыхащэжьыгъэр.
Ахэр зэкIэ къыгурыIощтхэп ащ фэдэ чIыпIэ имыфагъэм… Жьэу дунаим тетыр бэ, ау ар о пфэхъурэп, уетхьалэ… Тхьэм селъэIу ащ фэдэ чIыпIэ ащ нахьыбэрэ зыпари имы-
фэжьынэу.
Ныбжьи сщыгъупшэжьыщтэп отделением чIэт медсестрахэм ащыщэу Вероника Политаевам игущыIэхэр. «ЦIыф пстэуми: министрэми, пхъэнкIакIоми, зынэхэм ымылъэгъурэми, зытхьакIумэ зэхимыхырэми.., дунаим псаоу тетынэу фитыныгъэ иI. Арышъ, тыздеIагъэу, зыпсэ къэдгъэнагъэр нахьыбэ къэси, тэркIэ нахь гушIуагъу» ыIуагъ ащ.
Коронавирусыр къежьэным ыпэкIэ медицинэм инэмыкI сэнэхьат рылажьэщтыгъэу бэ госпиталым непэ Iоф щызышIэрэр. Зыр хирургыгъ, адрэр гум еIазэщтыгъ, ящэнэрэр неврологыгъ… ГущыIэм пае, къызщытэIазэщтыгъэхэм чIэтыгъэ медбратэу Павел Зарапиным поликлиникэм массажистэу Iоф щишIэщтыгъ. Медицинэм тегъэуагъэм хахъуи, IэпыIэгъу ящыкIагъэ зэхъум госпиталым къэкIуагъ.
Мыекъопэ къэралыгъо технологическэ университетым имедицинэ институт истудентыбэ мыщ чIэт. Ахэр врачхэм яIэпыIэгъушхох, цIыфэу чIэлъхэм ягужьыдэгъэкIыпIэх. Лъэшэу сафэраз ныбжьыкIэ цIыкIухэм. СыхьатныкъокIи тизакъоу тыкъагъанэщтыгъэп, тикIалэхэм фэдэу къытфэгумэкIхэу ташъхьагъ итыгъэх. ЕтIани зэкIэ къыташIэфын фаер ашIэщтыгъ, хэшIыкI зэрэфыряIэр къахэщэу аIэ екIущтыгъ. Ахэр врач хьазырых.
ЫпэкIэ зигугъу къэсшIыгъэхэм анэмыкIэу госпиталым ия 7-рэ къат Iоф щызышIэхэрэм ацIэ къесIомэ сшIоигъу. Ахэр: сабый ежэрэ бзылъфыгъэхэу коронавирусыр къызэолIагъэхэм яIэзэрэ врачэу Ольга Бережнаяр, медсестрахэу Светлана Гаджиевар, Наталья Шевченкэр, Вероника Кулагинар, Анна Тахмазян, Ирина
Букановар, Галина Авдеевар, Джавгарат Ширововар, медбратхэу Бикаев Мовсур, Ганукаев Джабраил, Дадаев Лом-Али, Оз Кемал, Арсмик Арземиковыр, санитаркэхэр.
Сэ сшъхьэкIи, я 13-рэ палатэм къыздилъыгъэхэм ацIэкIи зэпстэумэ «тхьашъуегъэпсэу» ясэIо, шъхьащэ афэсэшIы! Псауныгъэ пытэ яIэнэу, уз мэхъаджэм къыухьанхэу, яунагъомэ адатхъэу щыIэнхэу сафэлъаIо!
МЭЩЛIЭКЪО Сафыет.
Къалэу Мыекъуапэ.