КIымэфэ зыгъэпсэфыгъор къэсыгъ

Урысыем футболымкIэ изэнэ­къокъу хэлэжьэрэ командэхэу апшъэрэ купым хэтхэм я 19-рэ ешIэгъухэр яIагъэх.

КIэуххэр

«Шъачэ» — «Динамо» — 2:0, «Ротор» — «Арсенал» — 1:0, «Зенит» — «Спартак» — 3:1, «Химки» — «Локомотив» — 3:2, «Краснодар» — «Уфа» — 1:0, «Ахмат» — «Рубин» — 0:0, «Ростов» — ЦСКА — 1:3, «Тамбов» — «Урал» — 1:1.

ЕшIэгъу шъхьаIэу Санкт-Петербург щыкIуагъэм «Зенитрэ» «Спартакрэ» щызэIу­кIагъэх. «Зенит» нахь гъэшIэгъонэу, псынкIэу ешIагъ, текIоныгъэр ифэшъуашэу къыдихыгъ.

ЦСКА-р «Ростов» 3:1-у зэрэтекIуагъэм къыхагъэщырэр Федор Чаловым гъого-гъуищэ «Ростов» икъэлапчъэ Iэгуаор зэрэдидзагъэр ары. Алан Дзагоевыр ухъума­кIохэм азыфагу итэу Iэгуаор къаIэкIихи, псынкIэу Ф. Чаловым къыритыгъ. Федор изакъоу къэлапчъэм пэблагъэу щытэу хъагъэм Iэгуаор дидзагъ.

ЦСКА-м итренер шъхьаIэу Виктор Гончаренкэр иIэнатIэ IуагъэкIыщтэу бэмэ къа­Iощтыгъ. Арэу щытми, «Ростов» зытекIом ыуж ЦСКА-м итренер шъхьаIэ дэгъоу Iоф ышIэу А. Аршавиным, К. Новиковым, нэмыкIхэм хагъэунэфыкIыгъ.

«Химки» «Локомотивым» дешIэзэ, пчъагъэр 1:2-у зэIукIэгъур шIуахьыщтыгъ. Кухарчук я 85-рэ такъикъым, Долговым я 90-рэ такъикъым ыуж хъагъэм Iэгуаор дадзи, 3:2-у «Химки» текIоныгъэр къыдихыгъ.

«Химки» апшъэрэ купым къыхэзыщтмэ ахэтыгъ. И. Черевченкэр тренер шъхьаIэу клубым заштэм, зэIукIэгъуи 6-мэ зэкIэлъыкIоу текIоныгъэр къащыдихыгъ.

«Краснодар» 1:0-у «Уфам» къышIуихьыгъ. Кабеллэ ухъумакIом къыIэкIихи, ыпэкIэ ытыгъэ Iэгуаом Берг лъычъагъ, къэлапчъэм дидзагъ. «Краснодар» зэIукIэгъуи 3-мэ текIоныгъэр къащыдихыгъ. Тренер шъхьаIэу Мурад Мусаевыр къаубыжьырэп, иIэнатIэ IуагъэкIынэу къэбархэр зэхэтхыжьыхэрэп.

Футболым щыцIэрыIо Андрей Тихоновым зэрилъытэрэмкIэ, «Краснодар» апэ ит командэхэм ахэуцожьын ылъэкIыщт.

«Ротор» ауж итыгъэми, «Арсенал» дэ­гъоу дешIагъ, 1:0-у къыхьыгъ. Футболыр ашIо­гъэшIэгъонэу Волгоград хэкум щыщхэр якомандэ лъэплъэх, фэгумэкIых. Апшъэрэ купым якомандэ къыхагъэнэжьы ашIоигъу.

«Тамбов» иIофхэр къеIыхыгъэх, ешIакIохэм игъом лэжьапкIэр аратырэп. Командэм стадион зэримыIэм къыхэкIэу Саранскэ щешIэ. Апшъэрэ купым «Тамбов» къы­хэзынымкIэ ичIыпIэ щынагъо.

«Ахмат» ыкIи «Рубин» осышхом щызэдешIагъэх. Тренер шъхьаIэхэу Андрей Тала­лаевымрэ Леонид Слуцкэмрэ якомандэхэр къэкIощт илъэсым нахь дэгъоу ешIэнхэ ямурад. «Ахмат» Тыркуем щылэ мазэм кIощт, зэIукIэгъуи 8 щыриIэщт.

Ижъырэ адыгэ къалэу Шъачэ икомандэ апэ итхэр къыщэщынэх. «Спартак» ыуж «Динамэм» 2:0-у текIуагъ. Заболотнэмрэ Юсуповымрэ зырызэ къэлапчъэм Iэгуаор дадзагъ. «Шъачэ» къэкIощт илъэсым иешIакIэ хигъэхъощтэу тренер шъхьаIэу Федотовым къыIуагъ.

Тренер шъхьаIэхэр

«Спартак» итренер шъхьаIэу Тедеско иIэнатIэ зэрэIукIыжьырэр шъхьэихыгъэу къыIуагъ. Германием кIожьыщт.

ЦСКА-р ятIонэрэ чIыпIэм щыI, Гончаренкэр иIэнатIэ къыIуагъэнэжьыщтэу ешIа­кIохэр мэгугъэх. «Ростов» зэрэтекIуагъэхэм тренер шъхьаIэм фыщытыкIэу фыряIэр къагъэлъэгъуагъэу тэлъытэ. Гончаренкэм итренер гуадзэхэм загъэрэхьатынэу игъо хъугъэу тэлъытэ.

«Локомотив», «Тамбов», фэшъхьаф коман­дэхэм ятренер шъхьаIэхэм рэхьат­ныгъэ яIэп.

Хэт тыдэ щыIа?

1. «Зенит» — 41
2. ЦСКА — 37
3. «Спартак» — 35
4. «Шъачэ» — 33
5. «Ростов» — 32
6. «Краснодар» — 30
7. «Динамо» — 30
8. «Локомотив» — 28
9. «Рубин» — 28
10. «Ахмат» — 26
11. «Химки» — 25
12. «Урал» — 21
13. «Ротор» — 14
14. «Арсенал» — 14
15. «Уфа» — 13
16. «Тамбов» — 13.

Анахьыбэрэ къахэщыгъэхэр

Къэлапчъэм Iэгуаор анахьыбэрэ дэзы-дза­гъэхэм шъуащытэгъэгъуазэ.
1. С. Азмун — 11, «Зенит»
2. А. Дзюба — 11, «Зенит»
3. М. Берг — 9, «Краснодар»
4. Э. Понсе — 8, «Спартак»
5. Д. Ларссон — 8, «Спартак»
6. Н. Влашич — 8, ЦСКА
7. К. Нобоя — 8, «Шъачэ»
8. Д. Деспотович — 7, «Рубин»
9. К. Кучаев — 6, ЦСКА
10. А. Ерохин — 6, «Зенит»
11. Р. Кабелла — 6, «Краснодар»
12. Д. Лесовой — 6, «Динамо»
13. Б. Бериша — 6, «Ахмат»
14. Ф. Чалов — 5, ЦСКА
15. А. Соболев — 5, «Спартак»
16. В. Кларссон — 5, «Краснодар»
17. Р. Мырзэ — 4, «Химки».
Я 19-рэ ешIэгъухэм ауж командэхэм загъэпсэфыщт. 2021-рэ илъэсым, мэзаем зэнэкъокъур апшъэрэ купым щырагъэ­жьэжьыщт.

Я 20-рэ зэIукIэгъухэр

27.02.2021
«Зенит» — «Ростов»
«Химки» — «Уфа»
«Локомотив» — ЦСКА
«Тамбов» — «Ротор»
«Ахмат» — «Динамо»
«Спартак» — «Рубин»
«Шъачэ» — «Арсенал»
«Краснодар» — «Урал».
ЕмтIылъ Нурбый.