Адыгеим истудент-медикхэмрэ пандемием илъэхъан чанэу Iоф зышIэгъэ волонтерхэмрэ добровольчествэм иресурснэ гупчэу «Волонтеры Адыгеи» зыфиIорэм бгъэхалъхьэу «Герой нашего времени» зыфиIорэр щаратыжьыгъ. 
Iофтхьабзэм хэлэжьагъэх Урысые общественнэ организациеу «Единэ Россием и НыбжьыкIэ гвардие» и Адыгэ шъолъыр къутамэ ипащэу, Мыекъуапэ идепутатэу Бэрзэдж Асыет, Урысые общественнэ организациеу «Единэ Россием и НыбжьыкIэ гвардие» ЮФО-мкIэ ифедеральнэ координатор ипшъэрылъхэр зыгъэцакIэу Владимир Кучеровыр, медицинэ IэпыIэгъу псынкIэ языгъэгъотырэ Адыгэ республикэ станциемрэ медицинэ тхьамыкIагъохэмкIэ гупчэмрэ яврач шъхьаIэу Сихъу Ахьмэд.
Урысые общественнэ организациеу «Единэ Россием и НыбжьыкIэ гвардие» ныбжьыкIэ чанхэм общественнэ наградэхэр аратынхэу 2017-рэ илъэсым ыгъэнэфагъ. Бгъэхалъхьэу «Герой нашего времени» зыфиIорэр зыфагъэшъуашэхэрэр наукэмкIэ, искусствэмкIэ, спортымкIэ, общественнэ IофшIэнымкIэ гъэхъэгъэшхохэр зышIырэ ныбжьыкIэхэр ары.
Урысые общественнэ организациеу «Единэ Россием и НыбжьыкIэ гвардие» и Координационнэ совет зэхэсыгъоу иIагъэм коронавирусыр къызэутэлIагъэхэм IэпыIэгъу афэхъугъэ медик-студентхэм бгъэхалъхьэу «Герой нашего времени» зыфиIорэр афэгъэшъошэгъэнэу унашъо щаштагъ. Джащ фэдэу молодогвардейцэ-волонтерхэм рэзэныгъэ тхылъхэмрэ Урысые общественнэ организациеу «Единэ Россием и НыбжьыкIэ гвардие» итамыгъэ зытет Iэпшъэхъурэ зэраратыщтхэмкIэ унашъо аштагъ.
«ЦIыфхэм IэпыIэгъу афэхъуным фэхьазыр ныбжьыкIэ чанхэм къэралыгъор зэрафэныкъор мыгъэ волонтерхэмрэ медикхэмрэ нэрылъэгъу къытфашIыгъ. Мыщ фэдэ охътэ мыпсынкIэм ныбжьыкIэ чанхэм ацIэ къетIон, ягъэхъагъэхэр хэдгъэунэфыкIын зэрэтлъэкIырэр лъэшэу сигуап», — къыIуагъ Урысые общественнэ организациеу «Единэ Россием и НыбжьыкIэ гвардие» ЮФО-мкIэ ифедеральнэ координатор ипшъэрылъхэр зыгъэцакIэу Владимир Кучеровым.
Адыгеим истудент-медики 9-мэ бгъэхалъхьэу «Герой нашего времени» зыфиIорэр къафагъэшъошагъ. Пандемием илъэхъан ахэм медицинэ IэпыIэгъу псынкIэ языгъэгъотырэ Адыгэ республикэ станцием ыкIи медицинэ тхьамыкIагъохэмкIэ гупчэм Iоф щашIагъ. Ахэр Ангелина Гутаревар, Руслан Дерибериныр, ШъхьэхъутIэ Филипп, Владимир Кобозевыр, Шъао Алый, Хьалъэкъо Долэтбый, Гаджи Гаджиевыр, Яков Ендовицкэр, Амрулла Изаевыр ары.
Волонтер IофшIэным чанэу зэрэхэлэжьагъэхэм фэшI Урысые общественнэ организациеу «Единэ Россием и НыбжьыкIэ гвардие» и Гупчэ штаб ирэзэныгъэ тхылъхэмрэ шIухьафтынхэмрэ Адыгеим иволонтери 10-мэ къафагъэшъошагъэх. Ахэр Роман Купиныр, Лиовник Багдасарян, Бэрзэдж Асыет, Кушъу Аскэр, Тазэ Бислъан, Барцо Закир, Яна Терещенкэр, Анатолий Коршуновыр, Ованес Шекерьянц, Тхьапшъэкъо Щамил ары.
«Мыгъэ «НыбжьыкIэ гвардием» пандемием пэуцужьыгъэ студент-медикхэм зэрэ Урысыеу тынхэр ащаритыгъэх. Ахэм мы илъэсым ушэтыпIэшхо зэпачыгъ, коронавирусыр къызэутэлIагъэхэм IэпыIэгъу арагъэгъотыгъ. Анахь чанхэм непэ бгъэхалъхьэу «Герой нашего времени» зыфиIорэр афэдгъэшъошагъ», — къыIуагъ Урысые общественнэ организациеу «Единэ Россием и НыбжьыкIэ гвардие» и Адыгэ шъолъыр къутамэ ипащэу, Мыекъуапэ идепутатэу Бэрзэдж Асыет.