Тхьаумэфэ мафэм АР-м и ЛIышъхьэу КъумпIыл Мурат коронавирусыр къызэолIагъэхэм ащяIэзэнхэу джыри чIыпIэ 260-рэ зыщагъэпсырэ Мыекъопэ къэлэ сымэджэщым щыIагъ.
Ащ иврач шъхьаIэу Владимир Лобода къызэриIуагъэмкIэ, кислородыр къэзытыщт станциехэр, къызэрыкIощтхэр агъэпсых, нэмыкI оборудованиеу ящыкIэгъэщтыр, псэуалъэхэр къыращалIэх. Гнойнэ хирургиемкIэ отделениеу чIыпIэхэр зыщашIыхэрэм иврачхэр коронавирусым узэрэпэшIуекIощтым феджэжьыгъэх, яIофшIэн рагъэжьэным фэхьазырых.
АР-м и ЛIышъхьэ Iофхэр зэрэлъыкIуатэхэрэр зэригъэлъэгъугъ, оборудованиер, нэмыкIэу ящыкIэгъэщтхэр игъом къещэлIэгъэнхэм ынаIэ тыригъэтынэу АР-м псауныгъэр къэухъумэгъэнымкIэ иминистрэу Мэрэтыкъо Рустем фигъэпытагъ. Охътэ кIэкIым госпиталым иотделение атIупщыныр шIокI зимыIэ Iофэу зэрэщытым ЛIышъхьэм къыкIигъэтхъыгъ.
— Зэпахырэ узым республикэм зыщиушъомбгъунэу зыригъэжьагъэм къыщыублагъэу ащ зыщяIэзэщтхэ чIыпIэ 1000 дгъэпсыгъэ, — къыIуагъ КъумпIыл Мурат. — Ахэм ащыщэу 870-р мы уахътэм агъэфедэ. Узым хьылъэ ышIыгъэхэр ары госпитальхэм ачIэлъхэр, адрэхэм яунэхэм арысхэу яIазэх. ЦIыфхэм япсауныгъэ ыкIи ящыIэныгъэ икъэгъэнэжьын пае врачхэм чэщи-мафи Iоф ашIэ. Нахь псынкIэ зэрафэшIыгъэщтым тэри тыпылъ, волонтерхэри, политическэ партиехэм, общественнэ организациехэм ахэтхэри лъэшэу къыддеIэх. Къыхэлажьэхэрэм зэкIэми сызэрафэразэм къыкIэзгъэтхъымэ сшIоигъу.
АР-м и ЛIышъхьэ къызэрэхигъэщыгъэмкIэ, госпитальхэм ящыкIагъэр зэкIэ яI. Анализхэр зыщауплъэкIущтхэ лабораториеу мы корпусыкIэм щагъэпсыщтми Iофхэр къыгъэпсынкIэщтых. Компьютернэ томографитIу кIэу къащэфынэу ыуж итых. Ахэр Мыекъуапэрэ Кощхьэблэ районымрэ ащагъэуцущтых.
Колл-гупчэм иIофшIэни хэушъхьафыкIыгъэу республикэм ипащэ игугъу къышIыгъ. Нэбгырэ 50-мэ ащ Iоф щашIэ. Арэу щытми, къафытеорэм ипчъагъэ лъэшэу хэхъуагъэшъ, игъо ифэжьыхэрэп. Операторхэр нахьыбэ ашIынхэу АР-м и ЛIышъхьэ псауныгъэм икъэухъумэнкIэ Министерствэм пшъэрылъ фишIыгъ.
АР-м и ЛIышъхьэ ипресс-къулыкъу