АР-м и ЛIышъхьэу КъумпIыл Мурат тхьамэтагъор зыщызэрихьэгъэ зэхэсыгъо ошIэ-дэмышIэ Iоф къэмыхъуным ыкIи машIор щынэгъончъэным фэгъэзэгъэ республикэ комиссием иIагъ.
УФ-м и МЧС и ГъэIорышIапIэу АР-м щыIэм ипащэ иIэнатIэ зыгъэцакIэгорэ Станислав Илющенкэм докладэу къыщишIыгъэм къызэрэщыхигъэщыгъэмкIэ, цIыфхэм ыкIи чIыпIэхэм якъэгъэнэжьынкIэ зыкI дежурнэ-диспетчерскэ къулыкъумрэ кризиснэ Iофхэм ягъэIорышIэнкIэ Гупчэмрэ агъэфедэхэрэр. Ащ фэшI къулыкъур кадрэхэмкIэ нахь гъэпытэгъэн, техникэу ящыкIагъэми хэгъэхъогъэн фае. Джащ фэдэу машIом пэшIуекIорэ подразделениеу шIоигъоныгъэ зиIэхэр зыхэтхэми нахь зягъэушъомбгъугъэн фае.
АР-м и ЛIышъхьэ ащ фэдэ подразделениехэр нахьыбэ шIыгъэнхэр игъоу ылъытагъ. ЧIыопсым ылъэныкъокIэ ошIэ-дэмышIэ Iофэу къэхъущтыр пэшIорыгъэшъэу гъэунэфыгъэным шIэныгъэлэжьхэр къыхагъэлэжьэнхэм мэхьанэ зэриIэми къыкIигъэтхъыгъ.
— Тиреспубликэ псы къиугъэхэм мызэу-мытIоу къин къыфихьыгъ, — къыIуагъ АР-м и ЛIышъхьэ. — Мы лъэныкъомкIэ псы къэкIуапIэхэмкIэ Федеральнэ агентствэм Iоф дэтэшIэ ыкIи Iофыгъоу щыIэхэр дэгъэзыжьыгъэнхэм фытегъэпсыхьэгъэ «гъогу картэр» зэхэдгъэуцуагъ. Къихьащт илъэсыми мы IофшIэныр муниципальнэ образованиехэм адылъыжъугъэкIотэн фае.
Ощх-осхэр бэрэ зыщымыIэхэкIэ псыхъохэм псэу адэтым къызэрэщыкIэрэм иягъэу къакIорэми республикэм ипащэ игугъу къышIыгъ. Мыекъуапэрэ Мыекъопэ районымрэ ащыпсэухэрэм псэу зэшъощтхэр икъоу аIэкIэгъэхьэгъэным пае псыубытыпIэм ишIын лъагъэкIуатэ, ащ ипроцент 97-р ашIыгъах.
— Мы проектыр тыухэу зыттIупщыкIэ, псы къабзэу цIыфхэм ящыкIагъэр зэпыу имыIэу аIэкIэхьащт. Непэ псы кубометрэ мини 100 къакIомэ, ар мини 140-м нэсыщт, — къыIуагъ республикэм ипащэ.
АР-м и ЛIышъхьэ ипресс-къулыкъу