Процент 20-кIэ нахьыбэ хъугъэ

Зэпахырэ узэу дунаир зэлъызыкIугъэм зызэриушъомбгъурэм ыпкъ къикIыкIэ медицинэ IэпыIэгъу псынкIэм тегъэуагъэр нахьыбэ хъугъэ.

Медицинэ IэпыIэгъу псынкIэм и Адыгэ республикэ станцие ыкIи медицинэ катастрофэхэмкIэ Гупчэм яврач шъхьаIэу Сихъу Ахьмэд къызэриIуагъэмкIэ, чэщ-зымафэм гъогогъу 1300-м нэсэу цIыфхэм закъы­фагъазэ. БлэкIыгъэ илъэсым егъэпшагъэмэ, гурытымкIэ лъы­тагъэу, процент 20 — 25-рэ фэдизкIэ нахьыбэ хъугъэ.

Ахьмэд Пшызэ къэралыгъо медицинэ академиер 2008-рэ илъэсым къыухыгъ. Интернатурэм ыуж Адыгэкъалэ исы­мэджэщ травматологэу илъэситфырэ Iоф щишIагъ, нэужым Пэнэжьыкъуае икъоджэ вра­чыгъ, поликлиникэу дэтым ипэ­щагъ, 2018-рэ илъэсым къыщыублагъэу джы зыдэщыIэм къагъэкIофэкIэ Теуцожь районым иврач шъхьэIагъ.

Пэщэ IэнатIэм зэрэIутым пае цIыфхэм яIэзэщтмэ къыгъэнагъэп, травматолог IофшIэныр дихьыгъ. Мэлылъфэгъу мазэм ежьыри, ишъхьэгъуси, исабыйхэми зэпахырэ узыкIэр къяолIагъэу къычIэкIыгъ. Ащ пае унэм зыщисыгъэ уахътэми иIофшIэн къэуцугъэп, пэIудзыгъэ шIыкIэм тетэу врач шъхьаIэм ипшъэ­рылъхэр ыгъэцэкIагъэх, коронавирусым пэшIуекIогъэнымкIэ етIупщыгъэу адеIагъ.

Ипсауныгъэ зэтеуцожьи сымэджэщым къызегъэзэжьым, ащ къыIуащи IэпыIэгъу псынкIэм истанцие пэщэныгъэ дызэрихьанэу агъэкIуагъ. Зэпахырэ узым апэ итэу пэуцужьыхэрэм ар ащыщ.

— Медицинэм хэтхэм яIофшIэн зэрэзэхащэрэм непэ бэ епхыгъэ хъугъэр, арышъ, гупшысэным охътабэ едгъэхьынэу фитыныгъэ тиIэп, — еIо ащ.