Шъолъыр 54-мэ къахэщыгъэх

Хэгъэгум иныбжьыкIэхэм каратэмкIэ язэIукIэгъухэу къалэу Орел щыкIуагъэхэм Адыгэ Республикэм иеджакIохэр ахэлэжьагъэх.

Урысые Федерацием спортымкIэ и Министерствэ, Урысыем боевой искусствэхэмкIэ и Союз, УФ-м къаратэмкIэ и Федерацие зэхащэгъэ зэнэкъокъум хэгъэгум ишъолъыр 54-мэ къарыкIыгъэхэ бэнакIохэр хэлэжьагъэх.

Тренерхэу Владимир Васильченкэм, Вячеслав Леус, Руслан Ханжиевым агъэсэрэ пшъашъэ­хэр, кIалэхэр якъулайныгъэкIэ къахэщыгъэх, медали 6 къыда­хыгъ.

Илъэс 12 — 13 зыныбжьхэм язэнэкъокъу Тэхъутэмыкъое районым щыщ Елизавета Сахаровар хэлэжьагъ. Тренерэу Вячеслав Леус зипэщэ пшъашъэр пэшIорыгъэшъ зэIукIэгъухэм пхъашэу ащыбэнагъ, пытагъэ къызыхигъэфагъ. Е. Сахаровам дышъэр къыдихыгъ.

Ухъумэн шъуашэхэр ащыгъэу икъоу зэлъыIэсыхэзэ зыщызэ­нэкъокъугъэхэ едзыгъор гъэшIэгъонэу кIуагъэ. Мыекъопэ гурыт еджапIэу N 7-м зыщызыгъэсэрэ Егор Христофоровыр илъэс 12 — 13 зыныбжьхэм якуп хэтыгъ. ЗэIукIэгъуи 4 алырэгъум щыри­Iагъ. КIалэр тренерэу Владимир Васильченкэм егъасэ.

Е. Христофоровым кIуачIэмрэ къулаимрэ зэгъусэхэу текIоныгъэм фэбанэзэ, ухьазырыныгъэ дэгъу къыгъэлъэгъуагъ, тыжьыныр къыдихыгъ.

Илъэс 14 — 15 зыныбжьхэм якуп хэтэу Софья Воронцовам, тренерыр Руслан Ханжиев, ятIонэрэ чIыпIэр къыдихыгъ.

Икъу фэдизэу зэлъымыIэсыхэу «дзю-кумите» зыфиIорэ зэнэкъо­къум Виктория Гальченкэм ятIонэрэ чIыпIэр къыщыдихыгъ. Пшъашъэм Тэхъутэмыкъое районым зыщегъасэ. В. Гальченкэм нэмыкI едзыгъом джэрзыр къыщихьыгъ.

Тэхъутэмыкъое районым икIэ­лэеджакIоу ХъорэлI Дамир, тренерыр В. Леус, ящэнэрэ чIыпIэр къыхьыгъ.

— Адыгеим иныбжьыкIэхэм яIэпэIэсэныгъэ зэрэхагъахъорэр зэнэкъокъум къыщылъэгъуагъ, — къытиIуагъ тренерэу Владимир Васильченкэм. — ХагъэунэфыкIырэ чIыпIэхэр къыдэзыхыгъэ­хэм спортымкIэ разрядхэр къаратыщтых.

Краснодар краим каратэмкIэ изэIухыгъэ зэнэкъокъоу тыгъэгъазэм щыIэщтым хэлэжьэнхэу Адыгэ Республикэм икIэлэеджа­кIохэм ямурад.