Данием щыкIощт

Европэм гандболымкIэ ибзылъфыгъэ командэхэм язэнэкъокъу тыгъэгъазэм и 3 — 20-м Данием щыкIощт.

Урысыем ихэшыпыкIыгъэ командэ зэIу­кIэгъухэм ахэлэжьэщт. Тренер шъхьаIэу Амброс Мартин тихэгъэгу ыцIэкIэ зэнэкъо­къум щешIэщтхэр къыхихыгъэх.

КъэлэпчъэIутхэр: Анна Седойкина, Виктория Калинина, Галина Габисова; ешIакIохэр: Кристина Кожкарь, Дарья Самохина, Юлия Манагарова, Ольга Фомина, Анастасия Илларионова, Ксения Макеева, Анна Вяхирева, Ольга Горшенина, Антонина Скоробогатченко, Владлена Бобровникова, Полина Ведехина, Елизавета Малашенко, Дарья Дмитриева, Екатерина Ильина, Карина Сабирова.

Европэм командэ 16 щызэдешIэщт, ахэр купи 4-у гощыгъэх. Урысыер купэу «Б-м» хэт.

ЗэIукIэгъухэр
3.12
Урысыер — Испаниер
5.12
Чехиер — Урысыер
7.12
Урысыер — Швециер.

ПэшIорыгъэшъ ешIэгъухэм апэрэ чIыпIитIур купхэм къащыдэзыхыгъэхэр зэнэкъо­къум щылъыкIотэщтых.

Мыекъуапэ щыщ

Хэгъэгум ихэшыпыкIыгъэ командэ хэтэу Олимпиадэ джэгунхэу Рио-де-Жанейро дышъэр къащызыхьыгъэ Виктория Калининар Мыекъуапэ щыщ. Республикэм икIэлэцIыкIу-ныбжьыкIэ спорт еджапIэ зыщигъэсагъ. Урысыем изаслуженнэ тренерэу Евгений Поповыр иапэрэ тренер.

Виктория Калининар Мыекъопэ «АГУАдыифым» къэлэпчъэIутэу щешIэщтыгъ. БлэкIыгъэ илъэсхэм «Кубань» Краснодар хэтыгъ. Урысыем икомандэ анахь лъэшэу «Ростов-Доным» мыгъэ рагъэблэгъагъ.

Европэм и Кубок икъыдэхын фэбанэхэрэм Ростов-на-Дону иешIакIохэр ащыщых. Виктория Калининар Европэм щыцIэрыIу, къэлэпчъэIут анахь дэгъухэм ахалъытэ.

Данием щыкIощт зэнэкъокъухэм В. Калининам дэгъоу зафигъэхьазырыгъ, имедальхэм ахигъэхъонэу фэтэIо.