Щыгъури, шъоури къыщыгъэлъэгъуагъэх

Шъолъыр шхыныгъо шъхьаIэхэм яапэрэ лъэпкъ зэнэкъокъоу «Урысыем иIэшIугъакIэхэр» зыфиIоу джырэ уахътэм къэралыгъом щыкIорэм адыгэ къуаем нэмыкIэу тиреспубликэ къыщыдагъэкIырэ бжьыныф щыгъумрэ шъоумрэ хэлажьэх.

ЗэкIэмкIи лъэныкъуи 8-кIэ зэнэкъокъущтых. Адыгэ Республикэм 4-кIэ лъэIу тхылъхэр ыгъэхьыгъэх: «Адыгэ къуай» зыцIэ шхыныгъор къыдэзыгъэкIыхэрэм я Союз ылъэныкъокIэ «Зэрэ къэралыгъо» зыфиIорэм адыгэ къуаер хагъэлажьэ; мэкъумэщ гъэфедэкIо кооперативэу «Бжьэмэтэ 12» зыфиIорэм адыгэ шъоур лъэны­къоу «УплъэкIу, шIу плъэгъущт» ыкIи лъэкъохьэу (пыльца) «Лэгъона­къэр» лъэныкъоу «IэшIур уадэжь» зыфиIорэм ахегъэлажьэх; фермерхэм я Союз адыгэ щыгъур лъэныкъоу «УплъэкIу, шIу плъэгъущт» зыфиIорэм къыщегъэлъагъо. Зэнэкъокъум текIуагъэхэр комиссием хэтхэм къыхахыщт, ау, шъугу къэтэгъэкIыжьы, шъори мэкъэтыным шъухэлэжьэн шъулъэкIыщт — тыгъэгъазэм и 2-м нэс сайтэу https://russiantastes.ru зыфиIорэм шъуихьэмэ.