«Урысыем иIэшIугъакIэхэр»

Урысыем мэкъу-мэщымкIэ и Министерствэ апэрэ лъэпкъ зэнэкъокъоу «Урысыем иIэшIугъакIэхэр» зыфиIорэр зэхищагъ. Ащ адыгэ къуаер хэлажьэ, непэ къыщыублагъэу шъумакъэ фэшъутын шъулъэкIыщт.

Къэралыгъом ишъолъыр 79-мэ ялъэпкъ шхыныгъо 500-м ехъу зэнэкъокъум къыщыгъэлъэ­гъуагъ. Мыхэм ахэдэщтых ыкIи мэкъу-мэщымкIэ Министерствэм илъэныкъо зэфэшъхьафхэм атегъэпсыхьэгъэ IэпыIэгъу программэм хэлэжьэщтых.

Бизнес цIыкIумрэ гурытымрэ мэкъумэщ-къыдэгъэкIыжьын Iофым ылъэныкъокIэ гъэхъа­гъэу яIэхэр къэгъэлъэгъогъэным, Урысыем ишъолъырхэм якъоджэ псэупIэхэм хэхъоныгъэ ягъэшIыгъэным, IофшIэгъакIэхэм къафэщэгъэнхэм зэнэкъокъур атегъэпсыхьагъ.

Шъолъыр шхыныгъохэм япхырыщынкIэ амалышIу хъущт ахэр къыдэзыгъэкIыхэрэр джащ фэдэу Урысые мэкъумэщ бан­кым цифрэ шъуашэкIэ къызэригъэлъэгъощтыр. Мы банкыр зэнэкъокъум игенеральнэ гъу­сэгъу. «Свое. Родное» зыфиIорэ нэкIубгъом къызэрихьащтхэм ишIуагъэкIэ бизнес цIыкIумрэ гурытымрэ ахэхьэрэ хъызмэтшIапIэхэм къыдагъэкIырэр нэмыкIхэм арагъэлъэгъушъущт ыкIи азыфагу зи къыдэмыхьэу IуагъэкIышъущт. ЗекIоным ылъэ­ныкъуи шъолъырхэм зырагъэ­ушъомбгъушъущт. Урысые мэкъумэщ банкым лъэныкъоу «Загляните к нам на огонек» зыфиIоу къызэIуихыгъэм хэлажьэх шхыныгъоу зекIохэр шъолъырым къезыщэлIэнхэ зиамалхэр. Джащ фэдэу банк картэхэм шхыныгъохэм ясурэт­хэр атырашIыхьащтых, ар къэ­ралыгъом ишъолъыр пстэуми алъыIэсыщт — нэбгырэ миллиони 7 фэдизмэ банкым ифэIо-фашIэхэр агъэфедэх.

Зэнэкъокъум илъэныкъо пэпчъ текIоныгъэ къыщыдэзы­хыгъэр тыгъэгъэзэ мазэм осэшI купым ыгъэнэфэщт. Непэ къыщыублагъэу тыгъэгъазэм и 2-м нэс цIыфхэм амакъэ атын алъэкIыщт. Тишхыныгъорэ тиреспубликэрэ шъори шъумакъэ афэшъутын шъулъэкIыщт мы нэкIубгъом шъуихьэмэ: http//russiantastes.ru