Гектари 100-м рагъэхъущт

Мыекъопэ районым дэжъыем икъэгъэкIын зегъэушъомбгъугъэным фытегъэ­псыхьэгъэ проект щыпхыращы. Ащ къыдыхэлъытагъэу дэжъые хатэм зырагъэу­шъомбгъунэу рагъэжьагъ.

Район администрацием къызэрэщаIуагъэмкIэ, 2018-рэ илъэсым къыщыублагъэу гектар 50 агъэтIысхьэгъах. Дэшхо къэгъэкIыным пылъ хъыз­мэтшIапIэхэм къэралыгъо IэпыIэгъоу афагъэнэфагъэм ишIуагъэкIэ джыри ащ фэдиз хагъэ­хъощт.

Мы уахътэм станицэу Къурджыпсырэ къутырэу Краснэ Улькэмрэ адэжькIэ чъыг цIыкIухэр ащагъэтIысхьэх. Мыгъэ гектар 55-рэ чIыгум рагъэ­кIунэу агъэ­нэфагъ. Ащ щыщэу 20-р дэжъые лъэпкъэу «трапезунда» зыфиIорэм рагъэубы­тыщт.

Ар Къырым къыращы. Къэзгъэ­кIыхэрэм къызэраIуагъэмкIэ, Къыблэ шъолъырыр пштэмэ, мы дэжъые лъэпкъыр ащ фэдэу бэу къыгъэкIынэу апэу ыуж ихьагъэр Адыгеир ары.

Дэжъыем грамми 3 — 5 ещэчы. Зэрэбагъорэм, чIыпIэм псынкIэу зэрекIурэм яшIуагъэкIэ бэмэ ар къыхахы. Ар бэ­дзэршIыпIэм дэгъоу зэрэщыIукIырэр, мыкIодэу бэрэ зэрэщылъырэр ары ащ икъэгъэкIын жъугъэу ыуж ихьанхэм ушъхьагъу шъхьаIэу иIэр.

Специалистхэм Мыекъопэ районым ичIыгу зауплъэкIум, дэжъые къыщыкIыным фытегъэ­псыхьагъэу агъэунэфыгъ. АмыгъэтIысхьагъэу, ежь-ежьырэу къэ­кIырэр зэрэбэм ар къеушы­хьаты.

Къыхэдгъэщымэ тшIоигъор дэжъые хатэхэр охътэ кIэкIым къапыкIэным фытегъэпсыхьэгъэ шIыкIэхэмкIэ къызэрагъэкIырэр ары. Зы гектарым чъыг 800-м ехъу тырагъэтIысхьэ.

Адыгеим икъушъхьэхэм, къушъхьэ лъапэхэм илъэсыбэм къэкIыжьырэ кондэ гектар 1691-рэ къащэкIы, мыгъэ ащ 104-рэ ахагъэхъон гухэлъ яI.