Тыркуем кIогъагъэх

Адыгеим ихъызмэтшIапIэхэм ащыщхэм ялIыкIохэр чъэпыогъу мазэм и 26 — 30-м Тыркуем икъэлэ шъхьаIэу Стамбул щыIагъэх. АР-м бизнесым IэпыIэгъу егъэгъотыгъэнымкIэ и Гупчэ а Iофтхьабзэр зэхищагъ. ЛIыкIо купым хэтыгъэх пындж­лэжьыным пылъ хъызмэт­шIапIэу ООО-у “Чэтыкъу” зыфи­Iорэр, чIыгулэжьынымкIэ пэ­рытныгъэр зыIыгъхэм ащыщэу ООО-у «Краснодарагроальянсыр» ыкIи адыгэ щыгъу къы­дэзгъэкIырэ хъызмэтшIапIэу Хъуажъ Аслъан зипащэр.

АпэрапшIэу ахэм ялIыкIохэр АО-у “Урысые экспортнэ гупчэр” зыфиIорэм ипредставительствэу Тыркуем щыIэм ипащэу Радик Гиматдиновым IукIагъэх. Продукциеу хъызмэтшIапIэхэм къыдагъэкIырэр Тыркуем зэрэщыIуагъэкIыщтым, бизнесыр мы къэралыгъом щызэхэщэгъэным къыдилъытэхэрэм, Iоф зыщызэдашIэщт лъэныкъохэм зэдатегущыIагъэх.

Джащ фэдэу Адыгеим икIыгъэ лIыкIо купым хэтхэм оптовэ сатыум пылъхэм я Ассоциа­циеу Стамбул щызэхащагъэм, компаниехэу Vega, Kongrat Grup, Rammi Foods Service, Ergroup, Tat Bakliyat, VIVALON AG, лэ­жьыгъэм ыкIи былымIусхэм япхыгъэ сатыум пылъхэм я Ассоциацие япащэхэм зэIукIэгъухэр адыряIагъэх. Пынджыр, натрыфыр ыкIи адыгэ щыгъур Тыркуем зэрэщыIуагъэкIыщтым фэгъэхьыгъэ зэзэгъыныгъэхэр зэдашIыгъэх.

Республикэм ихъызмэтшIапIэхэмкIэ мы къэралыгъом ибэдзэршIыпIэ мэхьэнэ ин зэриIэр тибизнесменхэм къыхагъэщыгъ. Адыгеимрэ Тыр­куемрэ тарихъ ыкIи культурнэ зэпхыныгъэу илъэсыбэ хъугъэу азыфагу илъыри, чIыпIэу зыдэщысхэри IэкIыб экономическэ IофшIэным зегъэушъомбгъугъэным фэIорышIэх.

Адыгеим ибизнесменхэр Тыр­куем зэрэкIуагъэхэр лъэпкъ проектэу “Международная ко­операция и экспорт” зыфиIорэм къыдыхэлъытагъэу зэхэ­щагъэ хъугъэ.