СичIыпIэгъу лъапIэхэр!
Зэрэдунаеу, Урысыери ахэм зэрахэтэу, джыдэдэм чIыпIэ къин зыщит лъэхъаным зыкъышъуфэсэгъазэ. ГухэкI нахь мышIэми, коронавирусыр къызэузхэрэм япчъагъэ хэхъо. Адыгеим ис нэбгырабэмэ ягупсэхэм, яныбджэгъухэм, яIахьылхэм хьадэгъур къалъыIэсыгъ.
Тикъэралыгъо пащэхэми, хэгъэгум и Президентэу Владимир Путиными зэпахырэ уз хьылъэм пэуцужьыгъэнымкIэ афэлъэкIыщтыр зэкIэ непэ ашIэ. Мафэ къэс тэ тыришыхьат пандемием пэуцужьыгъэнымкIэ унэшъо гъэнэфагъэхэр ащ зэришIыхэрэм. А узым тызэрэтекIощтым игугъапIэ ащ къытеты. Адыгэ Республикэм и ЛIышъхьэу КъумпIыл Мурати коронавирусым зимыушъомбгъунымкIэ, сымаджэхэм яIэзэгъэнымкIэ Iофыгъо зэфэшъхьафхэм язэшIохын ыуж ит.
Урысыем инаучнэ гупчэ пэрытхэм коронавирусыр къапымыпкIэным тегъэпсыхьэгъэ вакцинэхэр къащыхахых ыкIи ащаушэтых. ШIэхэу зызэрэтыухъумэшъущт вакцинэр щыIэ хъущт. ИжъыкIэ шъогъазэм, емынэм, тэлаум нэбгырэ миллионипшI пчъагъэмэ хьадэгъур къафихьыщтыгъ. ЦIыфхэм вакцинэр зыхарагъалъхьэ зэхъум ащ фэдэ уз Iаехэр кIодыжьыгъэх. Урысыем имедицинэ IофышIэхэр джыдэдэм псэемыблэжьэу, чэщи, мафи ямыIэу госпитальхэм ащэлажьэх. Ахэм лIыгъэ зэрэзэрахьэрэр тинэрылъэгъу.
Коронавирусым Адыгеим зыкъыщиштэу зырегъажьэм къуаджэхэу Афыпсыпэ, Пэнэхэс, Псэйтыку, Хьащтыку, поселкэу Кубаньстроим ащыпсэухэу яунэхэм арысынхэ фаеу хъугъэхэм сиунэе мылъку зыпэIухьэгъэ гъомылапхъэхэр аIэкIагъэхьагъэх.
Силъэпкъэгъухэм къарыкIощтым лъэшэу сегъэгумэкIы, зэпахырэ уз щынагъор псынкIэу дагъэзыжьынэу сэгугъэ. Инэм дэт район сымэджэщыр уахътэм диштэу зэтегъэпсыхьагъэным симылъку хэслъхьагъ. АгъэкIэжьыгъэ госпиталым мы илъэсым бэдзэогъум и 4-м къыщегъэжьагъэу коронавирусыр къызэутэлIагъэхэм ащяIазэхэу аублагъ. Сымэджэ 800-м ехъумэ ащ щяIэзагъэх, зипсауныгъэ щынэгъуапIэ итыгъэхэр псаоу къагъэнэжьыгъэх.
Адыгэ Республикэм зэкIэ щыпсэухэрэм сыкъяджэ япсауныгъэ анаIэ тырагъэтынэу, зэпахырэ узым зэрэпэуцужьхэрэ санитар шапхъэхэр блэкI имыIэу къыдалъытэнхэу, нэгуихъохэмрэ Iалъэхэмрэ зэрахьанхэу, социальнэ дистанциер амыукъонэу. Коронавирусым зимыушъомбгъуным пае цIыфхэр жъугъэу зыщызэIукIэрэ чIыпIэхэм, джэгухэм, хьадагъэхэм кIохэ хъущтхэп.
Илъэсыбэрэ Чукоткэм, Магадан хэкум, Красноярскэ краим, Адыгэ Республикэм Iоф защысэшIэм чIыпIэ къиныбэмэ, ушэтыпIабэмэ саIукIэу къыхэкIыгъ. Ау сыдигъуи нахьышIум сыщыгугъызэ сыпсэугъ, хэкIыпIэхэр къэзгъотыгъэх.
Тызэгъусэмэ джыри тызэрэтекIощтым сицыхьэ телъ! Нэбгырэ пэпчъ изэхэшIыкI ар зэлъытыгъэр! Шъушъхьи, къышъупэблагъэм япсауныгъи шъуафэсакъ!
Лъытэныгъэ къышъуфэзышIэу, 2002 — 2007-рэ илъэсхэм Адыгэ Республикэм и Президентыгъэу
Шъэумэн Хьазрэт Мэджыдэ ыкъор