IофшIэн зимыIэхэм социальнэ IэпыIэгъу ягъэгъотыгъэным пае сомэ мин 100003,5-рэ джыри Адыгеим къыфыхэгъэкIыгъэнэу Урысые Федерацием и Правительствэ чъэпыогъум ыухэсыгъ.
Правительствэм мы унашъор зиштагъэр Урысые Федерацием и Федеральнэ ЗэIукIэ бюджет мылъкур атегощэгъэнымкIэ икомиссие ащ къызыдырегъаштэ нэуж ары. Адыгеим ыцIэкIэ Къэралыгъо Думэм идепутатэу Владислав Резник ащкIэ ишIуагъэ къыгъэкIуагъ.
Шъугу къэтэгъэкIыжьы 2020-рэ илъэсым гъэтхапэм и 31-м къыщегъэжьагъэу IофшIэн зимыIэхэм ахъщэ анахь макIэу аратырэм зэрэхэхъуагъэр. Урысые Федерацием и Законэу «Урысые Федерацием щыпсэухэрэм IофшIэн къафэгъотыгъэным ехьылIагъ» зыфиIорэм диштэу IофшIэн зимыIэхэм социальнэ ахъщэ IэпыIэгъу аIэкIэгъэхьэгъэным тегъэпсыхьагъэу мы илъэсым имэлылъфэгъу къыщегъэжьагъэу зигугъу къэтшIыгъэ комиссиемрэ Правительствэмрэ сомэ миллиони 137,2-рэ Адыгеим къыфыхагъэкIыгъ. А мылъкур зэрагъэфедэрэм Адыгеим и ЛIышъхьэ пхъашэу гъунэ лъефы.
КъумпIыл Мурат къызэрэхигъэщыгъэмкIэ, Урысыем и Президентэу Владимир Путиным ыпкъ къикIэу цIыфхэм IэпыIэгъушхо къазэраIукIагъэм ишIуагъэкIэ пандемием къыкIэкIон ылъэкIыщтыгъэ тхьамыкIагъохэм къакIырагъэчын алъэкIыгъ.
Владислав Резник къызэриIуагъэмкIэ, хэгъэгум и Правительстви, и Парламенти цIыфхэм IофшIэн яIэным лъэшэу анаIэ тырагъэты. Мылъку тедзэхэр къафыхагъэкIызэ, IофшIэн зимыIэхэм, зыныбжь имыкъугъэ кIэлэцIыкIухэр зиIэхэм аратырэ ахъщэ IэпыIэгъум хагъэхъуагъ.
«Коронавирусым ыпкъ къикIыкIэ зиIофшIэн зышIокIодыгъэхэм Правительствэм тыригъусэу IэпыIэгъу тедзэ зэрядгъэгъотыщтым тапэкIи тыпылъыщт», — къыIуагъ Владислав Резник.
Адыгэ Республикэм и ЛIышъхьэ ипресс-къулыкъу