ЦIыфхэм алъыдгъэIэсын фае

КоронавирусыкIэу COVID-19-кIэ зэджагъэхэм джыри зеушъомбгъу­жьы. ГухэкIми, ар къызэуалIэхэрэм япчъагъэ зэрэдунаеу лъэшэу щы­дэкIуае.

Урысыер пштэмэ, гъатхэм анахьыбэу зынэсыгъагъэми шIокIыгъ. Госпиталэу агъэпсыгъэхэм чIыпIэу яIэхэр имыкъужьхэу, кIэу ашIых, ахэм Iоф ащызышIэщт специалистхэм ахагъахъо. Гъу­напкъэхэр зиIэ режимым джыри тытехьажьыным ищынагъо щыIэ хъугъэ. ХэкIыпIэу специалистхэм къыхагъэщырэр, амалэу щыIэмкIэ ти­зэхахьэ нахь макIэ тшIыныр, зэкIэми зэфэдэу санитарнэ шапхъэхэр дгъэцэкIэнхэр ары.

Коронавирусыр къызэуалIэхэрэм япчъагъэ зэрэхэхъожьырэм ыгъэгумэкIэу иеплъыкIэ къыриIотыкIыгъ урым лъэпкъым илIыкIоу, Адыгеим исхэм яобществэу «Арго» ипащэу Аристотель Спировым.

— ГухэкIми, зэпахырэ узэу дунаир зэлъызыкIугъэм джыри ыкIуачIэ къытегъэлъэгъу. Нэ­бгырабэхэм ар зэрэщыIэр ашIошI мыхъоу, щы­нэгъончъагъэр Iэпэдэлэл ашIыгъ, зышIошI хъу­хэрэми зэкIэкIожьыгъэу алъытагъ, а зэпстэумэ апкъ къикIэу Iофхэр нахь дэй хъугъэх. Коронавирусыр умылъэгъурэ, узфэмынэIосэ пый мэхъаджэу къычIэкIыгъ. Арышъ, тэщ фэдэу обществэхэм япащэхэм вирусыкIэр зэрэщынагъор, ащ зыщыуухъумэныр шIокI зимыIэ Iофэу зэрэщытыр, санитарнэ шапхъэхэр агъэцэкIэнхэ зэ­рэ­фаер тицIыфхэм темызэщэу алъыдгъэIэсыныр типшъэрылъ шъхьаIэхэм ащыщ.

ЦIыфхэр бэу зызэхахьэкIэ ары узым зызиу­шъомбгъурэр. Арышъ, джэгухэр, юбилейхэр, нэмыкI мэфэкI Iофтхьабзэхэр мы уахътэм зэхамыщэнхэу пшIымэ нахьышIоу сеплъы. Къин Iофыр тэ тIэ илъэп, ау ащи щызэIукIэщтыр нахь макIэ пшIын плъэкIыщт. Тинахьыжъхэу, коронавирусыр къяуалIэмэ, лъэшэу иягъэ аригъэкIыным ищынагъо зышъхьащытхэр, яунэхэм къарымыкIынхэми тынаIэ тетын фае.

ХЪУТ Нэфсэт.