Урысыер апэ ит

Латвиер — Урысыер — 1:4

Чъэпыогъум и 13-м зэIукIагъэх.

Урысыем иешIакIохэу къэлапчъэм Iэгуаор дэзы­дзагъэхэр: Кучаев — 29, Евгеньев — 51, Ле­совой — 56, Ломовицкий — 86.

Урысыем футболымкIэ ихэ­шыпыкIыгъэ ныбжьыкIэ командэ Европэм изэнэкъокъу хэлажьэ. Польшэм, Болгарием, Сербием, Эстонием, Латвием адешIагъ. КIэух зэIукIэгъур 4:1-у Латвием къышIуихьи, очко 23-рэ Урысыем ригъэкъугъ, купым апэрэ чIыпIэр къыщихьыгъ. Тренер шъхьаIэр Михаил Галактионов.

Польшэм очко 17 иIэр, Болгарием 15. Польшэм зы ешIэгъу къыфэнагъ, ар къыхьыми, Урысыем къыкIэхьажьыщтэп.

ПэшIорыгъэшъ ешIэгъухэр куп­хэм защаухыкIэ, командэ 16 финалым хэхьащт. 2021-рэ илъэ­сым, гъатхэм анахь лъэшхэр зэдешIэщтых, дышъэр зыхьыщтыр къэлъэгъощт.

Краснодар футболымкIэ и Академие щапIугъэхэ М. Сафоно­выр, М. Сулеймановыр, И. Игнатьевыр, ЦСКА-м щешIэхэрэ Ф. Чкаловыр, К. Кучаевыр, «Спартак» икъэлэпчъэIутэу А. Максименкэр, нэмыкIхэри хэгъэгум ихэшыпыкIыгъэ ныбжьыкIэ командэ щешIэх. Илъэси 8-кIэ узэкIэIэбэжьмэ, тихэшыпыкIыгъэ командэ Европэм икIэух зэнэкъокъу хэлэжьэгъагъ.

М. Сафоновым тыфэгушIо

ПэшIорыгъэшъ ешIэгъухэм тикомандэ текIоныгъэр къазэрэщыдихыгъэм фэшI тыфэгушIо, Европэм изэнэкъокъоу гъатхэм аухыщтым гъэхъагъэ щишIынэу фэтэIо.

Анахьэу тызыфэгушIо ыкIи тызыIукIэ тшIоигъор Матвей Сафоновыр ары.

Матвей ятэу Евгений Мые­къопэ баскетбол командэу «Динамо-МГТУ-м» щешIэщтыгъ, хъур­джанэм Iэгуаор бэрэ изыдзэ­рэмэ ащыщыгъ. Матвей кIэлэцIыкIоу баскетбол ешIэщтыгъ, унагъор Мыекъуапэ щыпсэу­щтыгъ. Сафоновхэр Краснодар зэкIожьыхэм, Матвей футболым нахь пыщагъэ хъугъэ, Акаде­мием аштагъ.

«Краснодар» имызакъоу, Урысыем ихэшыпыкIыгъэ командэу Станислав Черчесовыр зипащэм Матвей Сафоновыр рагъэблэ­гъагъ. Илъэс 21-рэ нахь ыныбжьэп, Урысыем ифутбол цIэрыIо щыхъугъ.

— Матвей Сафоновыр Урысы­емкIэ къэлэпчъэIут анахь дэ­гъу, — къыIуагъ спортышхом щы­зэлъашIэрэ Андрей Аршавиным.

УигухэлъышIухэр Тхьэм къыбдегъэхъух, Матвей!