«Уебэныным нахьи къыомыолIэным упылъымэ нахьышIу»

КоронавирусыкIэу дунаир зэлъызыкIугъэр къызэуалIэхэрэм япчъагъэ мафэ къэс нахьыбэ мэхъу. Ащ зимыушъомбгъуным пае цIыфыбэ зэхахьэ зэрэмыхъущтыр, санитарнэ шапхъэхэр гъэцэкIэгъэнхэр шIокI зимыIэ Iофэу зэрэщытхэр етIупщыгъэу специалистхэм къаIо нахь мышIэми, джыри ар зымыгъэцакIэрэр бэ.

Аущтэу Iофыр лъыкIотэн зыхъукIэ, тызэхэмыхьаным пае гъунапкъэхэр зиIэ режим гъэ­нэфагъэм тытехьанышъ, Iоф­шIапIэхэр зэфашIыщтых, унэхэм тарагъэтIысхьажьыщт. Гъат­хэу кIуагъэм зэкIэми тыушэ­тыгъэ ащ зэрарэу къыхьырэр. Джыри зэ а режимым къэралыгъор зытехьэкIэ, экономикэм иягъэу ригъэкIыгъэм хэхъощт, щыIакIэр нахь дэй хъущт.

Ар зэкIэми къыдгурыIон зэ­рэфаер, мы уахътэм санитарнэ шапхъэхэр дгъэцэкIэнхэр зэрэтипшъэрылъыр къыхагъэщыгъ ермэл ыкIи азербайджан лъэпкъхэм ащыщхэу Адыгеим исхэм яобщественнэ организациехэм япащэхэм гущыIэгъу тызафэхъум.

— КоронавирусыкIэр къызэолIагъэхэм япчъагъэ къызе­Iыхыжьым, ар зэкIэкIожьыгъапэу, цIыф лъэпкъыр узым те­кIуагъэу къытщыхъуи, санитарнэ шапхъэхэр зэкIэми Iэпэдэлэл тшIыжьыгъэх, — къыIуагъ азербайджанэу республикэм щыпсэухэрэм яобщественнэ организацие ипащэу Габил Ризаевым. — Мары нэрылъэгъу тызэрэтемыкIуагъэр. Вирусым ятIонэрэу къыгъэзэжьыгъэу зеушъомбгъу. Шапхъэхэм къа­фэдгъэзэжьын фаеу зэрэщытым Iо хэлъэп. Тэ тилъэпкъ пштэмэ, нахьыбэу тызщызэха­хьэрэр хьадагъэхэр, джэгухэр, юбилейхэр ары. Ащ фэшI, амалэу щыIэмкIэ, цIыфыбэ къа­рамыгъэблэгъэнэу темызэщэу ятэIо. Хьадагъэр тэ тIэ илъэп, ау ащи зы уахътэм нэбгырабэ щызэрэмыугъоиным тылъэплъэ, амыгъэцакIэуи афэтыдэщтэп. МэфэкI Iофтхьабзэхэр зэхамыщэхэнэуи афэтэгъэпытэ.

Вирусыр щынагъо, о пшъхьэ имызакъоу, цIы­фэу укъэ­зыу­цу­хьэрэми уягу­пшысэн фае. Сэ сишIошIыкIэ, цIыфхэр зы­фэ­са­къыжьынхэр, санитарнэ шап­хъэхэр агъэцэ­кIэнхэр шIокI зи­­мыIэ Iофэу зэ­рэщытхэр на­хьыбэрэ япIон фае. Къэбарлъы­гъэIэс амалхэм ащ игугъу зэрэзэпагъэугъэр тэрэзэп, вирусыр зэкIэмыкIожьэу а Iоф­шIэныр къэбгъэуцу хъущтэп.

ИеплъыкIэ джащ фэдэу къыриIотыкIыгъ ермэл лъэпкъым щыщхэу Урысыем щыпсэухэрэм я Союз и Адыгэ шъолъыр къутамэ исекретарэу Давид Амирханяни.

— Коронавирусыр зэрэзэкIэмыкIожьыгъапэр шъэфы зыпа­рэми ышIыгъэп, ау, ащ пае къэмынэу, къызэуалIэхэрэм япчъагъэ къызыщэкIэм, санитарнэ шапхъэхэр чIэтыдзыжьыгъэх, — къыIуагъ ащ. — Джы тыфай-тыфэмыеми, къафэд­гъэзэжьын, ары пакIошъ, Iофхэр зэрэхъурэмкIэ, нахь пхъэшэжьэуи тапылъын фае. Тэ ти­организациекIэ цIыфыбэ зыщызэхахьэрэ Iофтхьабзэхэр амал иIэмэ, зэхамыщэнхэу афэдгъэпытагъ. Зэхащагъэми нэбгырэ 40 нахьыбэ амыгъоиным тылъэплъэ. ЦIыфхэм та­къыгурэIошъ, ар дэгъу, зэра­гъэцакIэрэр теубытагъэ хэлъэу къэсIон слъэкIыщт. Мары чылыс хэушъхьафыкIыгъэу зэрэтиIэр шъошIэ. Ащ къекIуалIэхэрэр ыкIоцI чIагъахьэхэрэп, щагум Iофтхьабзэхэр зэкIэри щызэ­шIуахых.

Сэ сшъхьэкIэ коронавирусыр къысэолIагъ, зэрэмысэмэр­къэур сыушэтыгъэ. Уз мэ­хъадж, къыуишIэщтыр къэшIэгъуаеу щыт. Арышъ, Iофым хэшIыкI фысиIэу, сэ силъэп­къэ­гъухэм ямызакъоу зэкIэ рес­публикэм исхэм зыфэсакъы­жьынхэу, санитарнэ шапхъэхэр Iэпэдэлэл амышIынхэу сыкъя­джэ. Мы узым уебэныным нахьи къыомыолIэным упылъымэ нахьышIу.

ХЪУТ Нэфсэт.