Тарихъ романым техыгъэ фильмыр хьазыр

«Айщэт» зыфиIорэ тарихъ романым техыгъэ фильмыр къагъэлъэгъоным зэрэфэхьазырыр Адыгэ Республикэм и ЛIышъхьэу КъумпIыл Мурат исоциальнэ нэкIубгъохэм къащиIуагъ.

БэмышIэу КъумпIыл Мурат тхэкIо цIэрыIоу МэщбэшIэ Ис­хьакъ зэIукIэгъу дыриIагъ. Урысыем IофшIэнымкIэ и ЛIыхъужъ къэбар гушIуагъомкIэ АР-м и ЛIышъхьэ къыдэгощагъ — итхы­гъэу «Айщэт» зыфиIорэм техыгъэ фильмыр аухыгъ.

— СишIошIкIэ, тарихъыр зыпхырыщыгъэ тхыгъэм щыгъуазэр бэ. Адыгэ бзылъфыгъэу Айщэт Францием ШарлоттаЭлизабет Аиссе де ФерриолькIэ щашIэщтыгъэ. Ащ икъэбар фильмыр къытегущыIэ. Сэри ар къыдэкIыфэ сежэ. Фильмыр шэкIогъум икIэухым нэс хьазыры хъущт. Нэужым Мые­къуапэ, Налщык, Черкесскэ ыкIи къэралыгъом икинотеатрэхэм къащагъэлъэгъощт, — къыIуагъ КъумпIыл Мурат ыкIи фильмым щыщ пычыгъо цIыкIу иинстаграм нэкIубгъо къыригъэ­хьагъ.

Пстэуми зэлъашIэрэ Шар­лотта Аиссе фильмыр фэгъэхьыгъ. Черкес лъэпкъым щыщэу ащ зилъытэжьыщтыгъэ. Пшъэшъэ цIыкIоу атыгъугъагъ, илъэси 4 — 5 ыныбжьэу Францием къыгъэкIогъэ лIыкIоу де Ферриоль Истамбыл щищэфыгъ ыкIи ихэку зыдищэжьы­гъагъ. Аиссе ащ дэгъоу ще­джагъ ыкIи шIэныгъэ куухэр иIэхэ хъугъагъэ. Пшъэшъэжъыем идэхагъэ, зызэришIырэм яшIуагъэкIэ пстэуми псынкIэу зэлъашIагъ, ыцIэ чыжьэу Iугъэ.

Сурэтхэр фильмым ипычыгъоу КъумпIыл Мурат исоци­альнэ нэкIубгъо къыригъэхьагъэм техыгъэх.