Шхыныгъо стырхэр зэраратырэм лъэплъэх

УблэпIэ классхэм арыс кIэлэеджакIохэм ыпкIэ хэмылъэу шхыныгъо стырхэр зэраратырэм фэгъэхьыгъэ уплъэкIунхэр «НыбжьыкIэ Гвардием» хэтхэм зэхащэх. Къыхэгъэщыгъэн фае Адыгеим ис кIэлэеджакIохэу ублэпIэ классхэм ащеджэрэмэ зэкIэмэ ар зэраIэкIагъахьэрэр.

Партием ипроектэу «Новая школа» зыфиIорэм къыдыхэ­лъытагъэу «НыбжьыкIэ Гвардием» хэтхэр ыкIи активистхэр Гимназиеу N 22-м мы мафэхэм щыIагъэх.

Адыгеим ит еджэпIэ 132-мэ ачIэс кIэлэеджэкIо 24822-мэ шхыныгъо стыр араты. Рос­потреб­надзорым и ГъэIорышIапIэу Адыгеим щыIэр ягъусэу зэхагъэуцогъэ менюмкIэ бжы­хьэ-кIымэфэ уахътэм кIэлэ­еджакIохэм пчэдыжьы­шхэ арагъэшIы.

— ШхапIэмрэ гъомлапхъэхэр зыщытIыгъхэмрэ шапхъэу щы­Iэхэм адештэх. КIэлэеджакIохэм гущыIэгъу тафэхъу, яеплъыкIэ­хэр къыдэтэлъытэх. Сабыйхэр тэгъэразэх. ИлъэсыкIэ еджэ­гъум къыщегъэжьагъэу ублэпIэ классхэм ачIэсхэр ыпкIэ хэмылъэу зэрэшхэщтхэм ны-тыхэри ыгъэ­гушIуагъэх, — къыIуагъ Гимназиеу N 22-м ишхапIэ иIофышIэу Барцыц Фатимэ.

— Iоныгъом къыщегъэжьа­гъэу республикэм ит гурыт еджапIэхэм шхыныгъо стырхэр кIэлэеджакIохэм зэраратыхэрэр тэуплъэкIу. Къыхэгъэщыгъэн фае кIэлэегъаджэхэм, ны-тыхэм ямызакъоу, ежь кIэлэеджакIохэми шхыныгъо стыр зэрящыкIагъэр къызэрагурыIорэр. Пкъы­шъолым ищыкIэгъэ гъомлапхъэр IэкIахьэмэ, сабыйхэм ашъхьэ къэузырэп, псынкIэу къэпшъы­хэрэп. КIэлэцIыкIухэр зыфаехэр, ахэм яеплъыкIэ къыдалъытэзэ ыкIи Роспотребнадзорым къыгъэуцугъэ шапхъэхэри амы­укъоу гъэсэныгъэм иучреждениехэм япащэхэмрэ еджапIэхэм яшхапIэхэм яIофышIэхэмрэ меню зэтефыгъэхэр зэрэзэхагъэуцощтым пылъых. Ны-тыхэри уплъэ­кIуным чанэу къыхэлажьэх. Гъомлапхъэхэр ауплъэкIух, ахэр зэраIыгъ шIыкIэми лъэплъэх. НахьыбэрэмкIэ ахэр пстэуми агъэразэх, — къыIотагъ «Ныбжьы­кIэ Гвардием» и Адыгэ шъолъыр къутамэ ипащэу Бэрзэдж Асыет.