Узым зимыушъомбгъуным пае

Тэрэзэу мащэхэмэ…

Коронавирусым земыгъэушъом­бгъу­гъэным пае щапIэхэм яуплъэкIун Iофхэр Адыгеим щылъагъэкIуатэх.


Мыекъопэ къэлэ администрацием зэхищэгъэ комиссием хэтхэр бэмы­шIэу Къэзэкъ бэдзэркIэ за­джэхэрэм щыIагъэх, эпидемием пэшIуекIорэ Iофтхьа­бзэхэр зэрэщагъэцакIэхэрэм зыщагъэгъозагъ.

Комиссием хэхьагъэх предпринимательствэмрэ гъэфедэкIо бэдзэрымрэ я ГъэIорышIапIэрэ къалэу Мыекъуапэ ошIэ-дэмышIэ IофхэмкIэ и ГъэIорышIапIэрэ ялIыкIохэр.

Бэдзэрым Iоф щызышIэхэрэмрэ щэфакIо къа­кIохэрэмрэ нэгу Iухъохэр зэрагъэфедэхэрэр ары анахьэу зылъыплъагъэхэр. ПредпринимательствэмкIэ къэлэ ГъэIорышIапIэм къызэрэщаIуагъэмкIэ, инспекторхэм щыкIагъэу къыхагъэщыгъэхэр араIох. Ащ нэмыкIэу зэшIуахын фаехэр бэдзэрым ипащэхэми, сатыушIхэу мыщ щылажьэхэрэми агурагъэIуагъэх.

УплъэкIуакIохэм къызэраIуагъэмкIэ, нахьыбэмэ ищыкIэгъэ шапхъэхэр агъэцакIэх: щакIохэм маскэхэр аIулъых, Iалъэхэри апылъых, къяуалIэхэрэри зызэраухъумэщт пкъыгъохэр амыгъэфедэхэу щапIэхэм къа­чIагъахьэхэрэп. Укъоныгъэу къыхагъэщыгъэхэри охътэ благъэм дагъэзыжьыщтых. Ар зымышIэхэрэм административнэ пшъэдэкIыжь арагъэхьыщт.

Коронавирусым зызыщиушъомбгъурэ лъэхъаным мыщ фэдэ шапхъэхэр арых зэкIэми агъэцэкIэнхэу щытхэр: щэпIэ чIэхьагъум узыр зыгъэкIодыщт пкъыгъохэр тетынхэ фае, Iоф щызышIэхэрэм яплъырыгъэ мафэ къэс ашынэу щыт, зызэраухъумэщтхэр щылажьэхэрэми, къяуалIэхэрэми агъэфедэнхэ, щапIэхэр дэгъоу атхьакIы зэпытынхэ фае, зэпэчыжьэу зэрэщытыщтхэ гъэтхъыгъэхэр джэхашъохэм атетынхэу щыт, нэмыкI пэшIорыгъэшъ Iофыгъохэри.

Мыекъуапэ иадминистрацие ипресс-къулыкъу къызэритырэмкIэ, пандемием илъэхъан Мыекъуапэ чIыпIэ 5863-рэ щауплъэкIугъ, укъоныгъэ 725-рэ къыхагъэщыгъ, ахэм ащыщэу 682-р лъэтемытэу дагъэзыжьыгъ. УплъэкIунхэм язэфэхьысыжьхэмкIэ административнэ пшъэдэкIыжь арагъэхьыным фэгъэхьыгъэ протокол 45-рэ зэхагъэуцуагъ (тхылъхэр хьыкумыр ахэплъэнэу агъэхьыгъэх).

ЧIэхьапIэм щауплъэкIух

Гъэсэныгъэм иучреждениехэу республикэм итхэм коронавирусыр къызлъыIэсыгъэхэр джыри къащыха­гъэщых.


Ар япшъэрылъэу муниципальнэ гъэ­псыкIэ зиIэ псэу­пIэ пстэуми яеджапIэхэм пчэдыжь къэс кIэлэцIыкIухэми, кIэлэегъаджэхэми чIэхьапIэм яплъырыгъэ щауплъэкIу, япсауныгъэ изытет щызэрагъашIэ.

— Роспотребнадзорым къыгъэнэфэгъэ шапхъэхэр дэх имыIэу бгъэцакIэхэ зыхъукIэ ары ныIэп гъэсэныгъэм иучреждениехэм непэрэ мафэм къэуцугъэ пшъэрылъым унаIэ щатетын зыплъэкIыщтыр. Жьым иукъэбзын, пстэуми яплъырыгъэ иуплъэкIун, къэбзэныгъэм ишапхъэхэм ягъэцэкIэн — мы зэпстэури районым иеджапIэхэмрэ икIэлэцIыкIу IыгъыпIэхэмрэ шIокI зимыIэ Iофтхьабзэхэу ащызэрахьэхэрэр арых. Районым щыпсэухэрэми тялъэIу тищынэгъончъагъэ фэдгъэIорышIэрэ Iофым яIахь къыхалъхьанэу!

— къыфэджэ Кощхьэблэ районэу гъэсэныгъэм иучреж­дениехэм зэпахырэ узыр къызщыхамыгъэщыгъэм иадминистрацие.