ХэбзэухъумакIохэм къаты

Джыри уахътэ яI

Урысые Федерацием и Президент иунашъо диштэу къэралыгъом щыпсэухэрэм ядокумент зырызхэр (яуахътэ икIыгъэу) бгъэзекIонхэ узэрэфитым къыдыхэлъытагъэу 2020-рэ илъэсым мэзаем и 1-м щегъэжьа­гъэу бэдзэогъум и 15-м нэс бгъэфедэнымкIэ зиуахътэ икIыгъэ водительскэ удостоверениехэр илъэсым ыкIэм нэс зэблахъунхэ алъэ­кIыщт.

Пандемием илъэхъан цIыфхэм IэпыIэгъу афэхъугъэным, ахэр ыкIи полицием икъулыкъушIэхэр къэухъу­мэгъэнхэм мы шIыкIэр фэIорышIэ.
Мы илъэсым мэкъуогъум и 9-м УФ-м хэгъэгу кIоцI IофхэмкIэ и Министерствэ унашъоу къыдигъэкIыгъэм къызэригъэнафэрэмкIэ, мэзаем и 1-м щегъэжьагъэу бэдзэогъум и 15-м нэс зиуахътэ икIыгъэ водительскэ удостоверениехэр тыгъэгъазэм и 31-м нэс зэбла­хъунхэ амал яIэщт. А мафэм нэс удостоверениехэм кIуачIэ яIэщт.
Документыр зэблэзыхъу зышIоигъо водительхэм къэралыгъо ыкIи муниципальнэ фэIо-фашIэхэм я ЗыкI портал къытырэ амалхэр къызфагъэфедэнхэ, ащ пае пэшIорыгъэшъэу зыщатхын алъэкIыщт.
2020-рэ илъэсым мэзаем и 1-м щегъэжьагъэу бэдзэогъум и 15-м нэс мыщ фэдэ удостоверение миллиони 2-м ехъу къэралыгъом щызэблахъун фэягъ, непэрэ мафэм ехъулIэу водитель миллион 1,6-мэ яфэIо-фашIэхэр афагъэцэкIагъэх.

Автомобилыр зепфэнымкIэ фитыныгъэ къэзытырэ тхьапэр зэблахъунымкIэ водительхэм джыри уахътэ яI, арышъ ахэр гузэжъонхэ ищыкIагъэп.

Наркотикхэр къыпкъырахыгъ

УФ-м хэгъэгу кIоцI IофхэмкIэ и Министерствэ иотделэу Мыекъуапэ щыIэм уголовнэ лъыхъонымкIэ икъулыкъушIэхэм оперативнэ Iофтхьабзэхэр рагъэкIокIызэ респуб­ликэм икъэлэ шъхьаIэ щыпсэурэ, ыпэкIэ хьапсым дэсыгъэ хъулъфыгъэм анаIэ тырадзагъ. ХэбзэухъумакIохэм къэбарэу къа­IэкIэхьагъэмкIэ ащ иунэ наркотикхэр щигъэбылъынхэ ылъэкIыщтыгъ.

Полицием икъулыкъушIэхэм хъулъфыгъэм ипсэупIэ къалъыхъузэ гъэбылъыпIэ къыхагъэщыгъ, ащ зэкIоцIыщыхьэгъэ пкъыгъохэр илъыгъэх. Эксперт-криминалистхэм зэрагъэунэфыгъэмкIэ ар грамми 130-м ехъу зэрылъ кIэп.

Мыщ епхыгъэу уголовнэ Iоф къызэIуахыгъ, хъулъфыгъэм лажьэ иIэу хьыкумым зигъэунэфыкIэ илъэси 10-м нэс хьапс къыхьын ылъэкIыщт.

АР-м хэгъэгу кIоцI IофхэмкIэ и Министерствэ ипресс-къулыкъу.