Нэбгырэ 52-рэ ешъуагъэу къаубытыгъэх

Адыгеим и Къэралыгъо автоинспекцие иIофышIэхэм Iоныгъом и 21-м къыщегъэжьагъэу и 27-м нэс республикэм игъогухэм ешъуагъэу машинэр ащызезыфэщтыгъэ нэбгырэ 52-рэ къыхагъэщыгъ.

Тхьамафэм къыкIоцI тигъогухэм хъугъэ-шIэгъи 7 къатехъу­хьагъ, ахэм нэбгыри 2 ахэкIодагъ, 8-мэ шъобжхэр хахыгъэх.

Ащ нэмыкIэу, уахътэу зигугъу къэтшIыгъэм къыкIоцI Адыгеим игъогухэм аварие 74-рэ къащыхъугъ, цIыфхэм шъобжхэр хахыгъэп. Ахэм янахьыбэр зыщыхъугъэр Тэхъутэмыкъое районыр (33-рэ) ыкIи къалэу Мыекъуапэ (30).
Къэралыгъо автоинспекцием къызэритыгъэмкIэ, автомобильхэм азыфагу илъын фэе зэпэчыжьагъэр къызэрэдамы­лъытагъэр иушъхьагъоу аварие 22-рэ къэхъугъ. Джащ фэдэу, зы машинэ дэчъэхыгъ, зы зэпыригъэзагъ, 48-р зэутэкIыгъэх. Пэрыохъоу ыкIи автомобилэу щытхэм атехьагъэхэу хъугъэ-­шIэгъэ 21-рэ (лъэсрыкIом — 1) агъэунэфыгъ.

ГИБДД-м иподразделениехэм мы мафэхэм гъогурыкIоным ишапхъэхэр гъогогъу 2229-рэ аукъуагъэу къыхагъэщыгъ.

Ешъуагъэу къаубытыгъэ водитель 52-мэ административнэ пшъэдэкIыжь арагъэхьыщт.

Административнэ протоколхэр лъэсрыкIуи 136-мэ алъэ­ныкъокIэ зэхагъэуцуагъэх.

Гъогу инспекторхэр транспортыр зезыфэхэрэм зафагъазэ сакъыныгъэ къызхагъэфэнэу, шIокI имыIэу гъогурыкIоным ишапхъэхэр агъэцэкIэнхэу.

ЛъэсрыкIохэми джащ фэдэу хэушъхьафыкIыгъэ зэпы­рыкIыпIэхэм атетхэу гъогур зэпа­чынэу щыт. БгъуитIумкIи заплъыхьанышъ, машинэхэр къэуцугъэхэ зыхъукIэ зэпырыкIыщтых.

НэкIубгъор къэзыгъэхьазырыгъэр
Iэшъынэ Сусан.