«ЭкоЦентрэм» къеты

Зыщымыгъэнэфэгъэ чIыпIэм щыратэкъугъ

Мыекъуапэ идэкIыгъохэм ащыщ къэ­лэдэсхэм хэкIитэкъупIэ ашIыгъэу шъолъыр операторым ар Iуихыжьыгъ.

Квадратнэ метрэ 500 фэдиз хъоу пыдзафэхэм арагъэубытыгъагъ. ЧIыпIэм игъэкъэбзэжьын фыте­гъэпсыхьэгъэ техникэ зэфэшъхьафхэр рафылIэхи, зы мафэкIэ кубометрэ мини 7-м ехъу Iуащыгъ.

— ХэкIым идэщын республикэм ипсэупIэхэм зэкIэми ащызэхэтщагъ, зыщымыгъэнэфэгъэ чIыпIэм ащэнышъ щыратэкъун ищыкIэгъэжьэп. ЧIыпIэшхо е лъэшэу зэхэлъэшъуагъэ горэ жъугъэкъэбзагъэу, хэкIыр бэу зэIукIагъэмэ, шъолъыр операторым лъэIу тхылъкIэ зыфэжъугъэзэн фае. Ащ итранспорт къэкIонышъ Iуищыщт, — къыIуагъ ООО-у «ЭкоЦентр» зыфиIорэм и Адыгэ шъолъыр къутамэ ипащэу Алыбэрд Налбый.

Шъугу къэтэгъэкIыжьы, чIыпIэу зыщымыгъэнэфагъэм хэкIыр щизытэкъурэм административнэ пшъэ­дэкIыжь егъэхьыгъэнэу законым къыщыдэлъытагъ. Тазыр къышъутырамылъхьаным ыкIи чIыопсыр шъумыушIоиным фэшI шъолъыр операторым зэзэгъыныгъэ дэшъушIынышъ, шапхъэхэм атетэу пыдзафэхэр Iуяжъугъэщынхэ фае. Интернет нэкIубгъоу https://adygea.clean-rf.ru зыфиIорэм лъэIу тхылъыр щышъутын шъулъэкIыщт, коммерческэ отделым ителефонкIэ шъукъытеоми хъущт. Номерыр: 8-918-425-96-22.

Джыри зэ шъугу къэтэгъэкIыжьы

Фэтэрыбэу зэхэт унэхэм ачIэс­хэм хэкIыр зыщыратэкъурэ площад­кэхэм унэе автотранспортыр Iуб­гъэуцо зэрэмыхъущтыр мызэу-мы­тIоу къэтIуагъ, джыри зэ шъугу къэ­тэгъэ­кIыжьы.

ХэкIыр Iузыщырэ автомашинэхэр якIолIэнхэ зэрамылъэкIырэм къыхэкIыкIэ, контейнерхэр ушъагъэу къанэхэу джыри бэрэ къыхэкIы хъугъэ. Ар Мыекъуа­пи, поселкэхэу Яблоновскэми, Инэми бэрэ ащытэ­гъэунэфы.

Бакхэр игъом умыунэкIыхэмэ, хэкIыр щагуми дизы мэхъу. Емыгупшысэу къыпэкIэфэгъэ чIыпIэм щызгъэу­цурэ водительхэр ары ащ зимысагъэ хэлъыр. Пыдза­фэхэр Iузыщыхэрэм такъикъи 3 — 10 зы площадкэм зэрэIутынхэ фэе пIалъэу яIэр. Зитранспорт тэрэзэу зымыгъэуцугъэхэм алъыхъухэзэ а графикыри укъуагъэ мэхъу.

— ХэкIыр дэзыщырэ транспортыр ымыгъэохъунэу яавтомашинэхэр агъэуцунхэу зэкIэми тялъэIу. Хьы­лъэзещэ автомашинэхэр зэрэинхэр, площадкэм екIолIэнхэм пае чIыпIэшхо зэрящыкIагъэр къыдэп­лъытэн фае. Нэбгырэ пэпчъ иакъыл ащ тыригъафэмэ, тиавтомашинэхэм игъом контейнерхэр къаунэкIыщтых, площадкэхэр къабзэ хъущтых, — къыIуагъ Алыбэрд Налбый.

ООО-у «ЭкоЦентр» зыфиIорэм
и Адыгэ шъолъыр къутамэ ипресс-къулыкъу.