Пчъагъэм тегъэгумэкIы

«Звезда» Звенигород – «АГУ-Адыиф» Мые­къуапэ – 37:23 (16:14).
Iоныгъом и 16-м Звенигород щызэдешIагъэх.

«Адыифым» хэтхэу къэлап­чъэм Iэгуаор анахьыбэрэ дэзыдзагъэ­хэр: Кобл – 4, Измайлова – 4, Кошубекова – 3, Морозова – 2, Клименко – 2.

ЗэIукIэгъум иапэрэ едзыгъо «Адыифыр» зэрэщешIагъэм тигъэ­гу­гъагъ. Типшъашъэхэр бэрэ апэкIэ илъыщтыгъэх, къэлапчъэм Iэгуаор дадзэным фэшI шIыкIэшIу­хэр къагъотыщтыгъ. Кобл Зурыет, Галина Измайловар, нэмыкI­хэри зэхэщэн Iофыгъохэм чанэу ахэлажьэщтыгъэх. ЕшIэкIо ныбжьыкIэу Юлия Кожубековар гупчэм нахь къащыхэщырэмэ ащыщыгъ.

«Звездар» зыпкъ итэу ешIэн зылъэкIырэ команд. ЯтIонэрэ едзыгъор зырагъажьэм, «Звездам» текIоныгъэр къызэрэдихыщтыр зэнэкъокъум къыщылъагъо­щтыгъ. «Адыифым» итренер шъхьаIэу Никита Голуб ар къыди­лъыти, ешIэкIо нахь ныбжьыкIа­Iохэри зэIукIэгъум хигъэлэжьагъэх – яIэпэIэсэныгъэ хагъэхъоным фэшI.

БлэкIыгъэ илъэсхэм «Адыифым» дэгъоу щешIэщтыгъэхэ Ксения Дьяченкэр, Алиса Дворцеваяр «Звездам» рагъэблэгъагъэх, ахэри зэIукIэгъум хэлэжьагъэх, тикомандэ икъэлапчъэ пчъагъэрэ Iэгуаор къыдадзагъ. «Звездам» 37:23-у текIоныгъэр къыдихыгъ. Тикомандэ я 7-рэ чIыпIэм щыI.

«Адыифым» иешIэкIо анахь дэгъухэм ащыщхэу Д. Богдановар, А. Серадскаяр зэрэсымаджэхэм къыхэкIэу зэIукIэгъум хэлэжьагъэ­хэп. Зичэзыу ешIэгъухэм яIэ­пэ­Iэсэныгъэ къащагъэлъэгъо­нэу тяжэ.

Iоныгъом и 26-м суперлигэм хэт командэхэу «Адыифымрэ» «Ладэмрэ» Мыекъуапэ щызэдешIэщтых.

Урысыем и Кубок къыдэхыгъэ­ным фэгъэхьыгъэ пэшIорыгъэшъ зэIукIэгъури тикъалэ щыкIощт. «Адыифыр» Iоныгъом и 27-м «Лада» Тольятти енэкъокъущт.